GIPALUYOHAN sa di momenos 60,000 ka mga sakop sa urban poor ug vendors sa dakbayan sa Sugbo ang tandem nila ni Mayor Michael Rama ug Edgardo Labella sa pagkamayor ug bise mayor alang sa piniliay karong Mayo 13.
Gisuportahan usab sa maong grupo ang tibuok slate sa Team Rama pagkakongresista ug pagkakonsehal.
Ang Urban Poor Solidarity Federation (UPSF) nga gilangkuban sa kapin 900 ka mga leader sa nagkadaiyang home owners associations nipakita sa ilang suporta sa Team Rama sanglit alang kanila ang maong grupo maoy makatabang kanila paghaw-as sa ilang kalisod.
“Daghan na kaayo siya og nahimo sulod sa tulo ka tuig. Usa niana gitarong niya ang pag implementar sa socialized housing program sa siyudad,” paghulagway ni Samsin Chiu, presidente sa UPSF ngadto kang Rama.
“Sa una, three years pa usa ma-approve ang subdivision plan. Ikapila namo na gibalikbalik sa City Hall, pero wa gyuy nahimo. Pero karon dali na lang kaayo,” testimoniya pa ni Reno Ventusa, sakop sa grupo.
Si Evangeline Abejo, sakop gihapon sa maong grupo, niingon nga kapin sa 300 ka homeowners associations ang nitambong kagahapon nga gilangkuan sa 900 ka mga leader ug adunay 50,000 ka mga miyembro.
Nitambong usab ang mga sakop sa Cebu City United Vendors Association nga adunay di momenos 10,000 ka mga sakop pinangulohan ni Maria Pino nga nagpasalamat sa Garbo Asenso Sumbanan Alyansa (GASA) nga gimugna ni Rama aron maoy moatiman sa mga vendor sa sidewalk.
Ang pagduso sa duha ka mga pundok gihangop pag-ayo ni Rama ug Labella nga alang kanila maoy dugang makapasiguro sa ilang kadaugan.
Ang UPSF ug si Rama ninglagda og kasabutan nga kon siya masublian pagkamayor, iyang ipatuman ang community development and environment protection, land acquisition, employment ug livelihood, social protection ug programa sa pagserbisyo, assets reform ug resource generation, engagement ug pag-apil sa urban poor sa maayong pangagamhanan.