DAVAO DEL NORTE -- Tulo ang patay samtang P1.7 milyones nga shabu, salapi sa druga, mga tag-as nga armas, marijuana ug sakyanan ang nasakmit sa kapulisan sa malampusong operasyon niadtong Sabado didto sa mga lungsod sa Sto. Tomas, Asuncion ug Tagum City.
Tulo ka mga dagko ug gikaintapang grupo sa mga kriminal ang gisulong sa Criminal Investigation and Detection Group (CIDG) sa Eastern Mindanao, Highway Patrol Group Region-Davao, ug Philippine Drug Enforcement Agency uban ang lokal nga kapulisan sa matag munisipyo.
Siyam ka search warrants batok sa mga notadong gun-for-hire, tigpahuyot og druga, namaligya og pusil ang gihuptan sa kapulisan.
Lima ang nasikop samtang upat ang misukol ug napatay sa kapulisan sa maong operasyon.
Sa pangkinatibuk-ang raid, siyam ang nasikop apil ang mga nasakpan sa akto nga nagpahuyot og druga sa lugar
Napatay mao sila Abil Nasser, 39, taga Asuncion, ug giilang lider sa Nasser Gunrunning Group; Hanron Saumay Sultan, hamtong, taga lungsod sa Sto. Tomas ug giilang lider sa Sultan Criminal Gang; ug Reynaldo Baquiran, 38, sa siyudad sa Tagum nga giilang lider sa Baquiran gun-for-hire.
Laing patay mao si Marven Padua, naa sa saktong edad ug molupyo sa syudad sa Tagum.
Laing mga suspetsadong dinakpan gikan sa lungsod sa Sto. Tomas mao sila Allan Bagnaan, 31; Erick Cabiling, 48; ug Rodel Cabiling, 30.
Sa syudad sa Tagum, nasikop usab sila Elvis Estrada, 41; Melchona Padua, 33; Mesael Obeso, 36; Renmarlie Durano, 18; ug Ramlah Nasser, 37, nadakpan gikan sa Asuncion.
"Succesful talaga. Nakuha ang lahat ng target. Yung mga napatay ay talagang hindi sila susuko. Alam nila ang ginagawa nila," komento ni Police Chief Inspector Franciz Sonza, hepe sa CIDG-Davao del Norte.
Sa kinatibuk-an, tulo ka kalibre .45 nga pistola, usa ka 9MM pistol, usa ka 357 revolver, usa ka kalibre 22 nga revolver, duha ka kalibre .38 nga revolver, usa ka hand grenade, tulo ka buhi nga bala sa 40MM, pito ka gramo nga pinaugang marijuana, duha ka way dokumento nga mga motor, upat ka mga sakyanan, ug P48,700 nga drug money ang nakuhang ebidensya gikan sa mga suspek.
"This is part of our intense campaign lalo papalapit na din ang election. Magamit ang mga gun-for-hire sa kaguluhan sa eleksyon," dugang ni Sonza.
Giangkon niini nga duhig sa pipila ka mga kaso sa pagpatay ang maong mga grupo.
Gisaad hinuon niini nga dili moundang ang kapulisan taliwala sa pagkapukan sa maong mga grupo.
"Hindi po matatapos diyan. Sa pagkawala nila, alam natin na merong uusbong. Marami pa po tayong gawin para sa mga residente ng Davao del Norte po," sulti niini.