Rene Cervantes Quimno
c/o CNU, Cebu City
ANG iyang ngalan kay Salvador Bulengot Pakatot. Daghang mahikatawa. Ug bation siyag kaulaw.
Nganong Bulengot man gyud ni? Ug nganong Pakatot pa gyud? Nganong dili man Cruz, sama sa John Lloyd Cruz? Nganong dili man Pascual, sama sa Piolo Pascual? O bisan Milby na lang unta, o Martin, o bisag Anderson na lang god. Kabati ba aning Bulengot Pakatot, uy! Unsa kahay resulta kon ginganlan pa siyag Prococoy? Prococoy Bulengot Pakatot!
Maayo na lang kay na-Salvador siya. Badong ang iyang angga. Bantugan siyang tigbatbat sa mga balak sa radio program nga “Mga Balak-Tampo ni Marikit Samboan.” Apan walay nasayod nga siya ra pod si Marikit Samboan nga aliyas ra niya. Sa radyo nainila siya isip ‘Kuya Badong.’
Sa edad nga 48 ulitawo pa gihapon si Kuya Badong. Never been touched; never been kissed! matod pa sa panultihon. Nahadlok siyang manguyab kay physically mora siyag ang character actor nga si Bentong. Nahadlok siya nga basig ‘mabasted’ sa babaye.
Usa ka adlaw nakadawat siyag sulat apan naka-adres kini para kang Marikit Samboan.
Nagkanayon ang sulat, “Tungod sa dako nakong pagdayeg sa imong mga balak nga gibatbat ni Kuya Badong sa kahanginan, sa hilom nahigugma ako kanimo, Marikit. Unta magkahimamatay ta puhon ug imo akong dawaton. Kanimo matinud-anon, Bolivar ‘Butcheck’ Diamante.”
Nasundan pa kini. Ug mga love letter na gayud ang gipadala ni Butcheck. Hangtod nga miduaw na gayud kini sa buhatan sa Saluyot Broadcasting. Ug sama kang Kuya Badong, physically mora pod diay og si Bentong kini si Bolivar ‘Butcheck’ Diamante.
Nagkaatubangay ang managkaluhang Bentong look-alike.
Namakak si Kuya Badong, “Sorry, Sir. Moanhi ra man dinhis estasyon si Marikit Samboan kon maghatod sa iyang mga balak.”
“Nadawat kaha to niya akong mga love letter, Kuya Badong? Nahigugma man god kos hilom kang Marikit Samboan. Guwapa gyud tingali siya kay nindot man siyag mga balak.”
Napaak ni Kuya Badong ang iyang dila aron pugngan ang pagkatawa. “Aw...oo, uy. Mora siyag si Toni Gonzaga. Taga Samboan tingali siya.”
Kanunay nang magyampungad sa radio station si Butcheck. Magul-anon. Morag nabuang ug kanunay maghinuktok. Apan dili puyde nga masayran niini kinsa gayud si Marikit Samboan. Basig maapektuhan unya ang ‘packaging’ sa nabantog na kaayong programa.
“Duna kay sulat,” matod ni Kuya Badong usa niana ka adlaw. “Gikan ni Marikit Samboan.”
Gibasa ni Butcheck nga mahinamon, “Nasayod ko nga sinsero ka ug dako gayud ang imong gugma kanako. Apan aduna koy kaugalingong kalibutan: ang akong mga balak. I love you, too, Butcheck. Apan pangita na lang og laing babaye, ug isipa nga damgo ra ang tanan. – Marikit Samboan.”
Gikaguol diay kadto pag-ayo ni Butcheck. Pagka sunod semana mibalik kini sa estasyonan sa radyo nga nagwara-warag plakard. Nagaguyod og kanding. Nagkamuritsing. Nagniwang pag-ayo. Walay sinina. Nag-brep ra. Ug kalit nga nanukmag kang Kuya Badong.
“Tunto ka! Nitug-an ang dyanitor nga ikaw ra diay si Marikit! Gipanamastamasan nimo ang akong gugma, buanga ka!”
KARON nagbatbat na sab si Kuya Badong sa mga balak diha sa iyang programa. Nakaluha siya nga nahinumdom kang Boliver ‘Butcheck’ Diamante. Naluoy siya sa ulitawo nga nabuang sa talagsaong gugma niini kang Marikit Samboan. (KATAPUSAN)