KALMA ug mapaubsanon nga nag-awhag si Provincial Board Member Gigi Sanchez sa unang distrito sa lalawigan sa Sugbo sa pag-uli na sa exciter aron makatingog na sa pagbalik ang tulo ka sibyaan sa Bantay Radyo, human mipagawas og preliminary injunction ang korte.
Kini nagpasabot anaa ni Sanchez ang katungod sa pagduma ug pagpadagan ubos sa Lacto Pafi nga iyang gipanag-iya sa dihang unang gipagawas sa korte ang Temporary Restraining Order (TRO). Dungan sa panghinaot nga sundon ang balaod.
Sa interview sa programang Catharsis sa dyLA, gipadayag sa mapailubon nga magbabalaod nga minilyon ka pesos na ang iyang naalkanse human nawagtang sa kahanginan kon off air ang Bantay Radyo human gikuha ang tulo ka exciter.
Kon imong analisahon, nasudlan og kagaw sa pulitika ang SIAM Broadcasting ubos sa pamilyang Zaraga sa pakig kontrata sa Cebu CFI Cooperative. Nanghinaot intawon ang naligsan sa maong away nga masulbad na kining tanang problema.Human mipadayag og kaandam ang SIAM ug CFI alang sa usa ka panagsabot ngadto ni Sanchez.
Eddiedul dugang gubot
Si kanhi kongresista Eddie Gullas o Eddiegul nagdugang sa kagubot sa Liberal Party (LP) sa 1st District. Mao kini ang alegasyon ni Mayor Abe Canoy sa lungsod sa San Fernando, orihinal nga sakop sa LP.
Nasagmuyo si Canoy human gitudlo ni DILG Secretary Mar Roxas si Ist district Congressman Samsam Gullas isip district chairman sa LP.
Si Samsam, apo ni Eddiegul, pangulo sa Alayon Party maoy makontra ni Canoy sa pagka kongresista. Ang komentaryo gani sa uban, mat-an pa sa moskitero si Gullas. Samtang di masulbad ang problema apil sa maligsan mao si Talisay City Mayor Johnny delos Reyes, orihinal ug lunod-patay gihapon nga LP.
Mao nga ipakita ni Gobernador Hilario Davide II isip provincial chairman sa LP nga kamao kini ug dili mahimong pahoy. Suod ug pinangga si Davide ni Presidente Benigno Aquino III. Unya mosugot lang siya nga maapil og kaguba ang iyang kandidatura?
Danao batok Cebu City
Karon nang Dominggo, Septiyembre 6, ang exibition game sa duwang badminton nga ipahigayon sa Danao City Sports Center tali sa team ni board member Jude Sybico ug Mayor Ramonito Durano batok Cebu City Badminton team ni Cebu City Mayor Mike Rama.
Kini subay sa ilang duha ka adlaw nga tournament nga pagasugdan karong september 5 subay sa pagsaulog sa ilang piyesta.
(efren_lonzon@yahoo.com, 09438741888)