DIPAY laeng limmamiis ti bara ti isyu iti panagsigsigarilyo ni Apo Pinoy, adda manen simmaruno nga ASUK. Daytoy ket idiay met senado wenno akingato a pagpandayan ti linteg. Bimmanaten ni Senadora Pia Cayetano gapu iti reklamo dagiti empleados mismo iti senado. Adda ngamin kano dagiti senador a sukir a sumurot iti annuroten ti RA 9211 wenno ti Tobacco Regulation Act of 2013 a mangiparparit iti panagsigarilyo kadagiti public places, confined areas kas dagiti ospital, eskuelaan, medical clinics, public terminals ken adu pay a disso. Adu kano kadagiti empleados ti senado ti kayatna ti agreklamo ngem agamakda laeng a mangibaga. Kuna ni Cayetano a rumbeng nga agbalin koma a kas modelo dagiti senador ta isuda ti adda iti kangatuan a pagpandayan iti linteg. Napotar ti linteg babaen iti pinal nga inda pananggamulo. Daplis: sinno kano aya ti sukir a MANNABAKO dita? Shhh! Tagtagari amangan ta mangegnakayo ni Sen. Chiz Escudero! Ha? Apay isu? Sabagay, agbarkadada met ketdi ken ni P. He he... Mabalin ngata nga agmamakayo laengen? Oh, my God! Presidente ken senador... agmama? Oh, my MOMMA.
***
Idiay Metro Manila, adda kano 60,000 squatters kadagiti igid ti pagayusan ti danum ti mapaikkat. Urgent pay tapno mapengdan ti layus. Maria kusina. Papanandan? Ti ngamin imasna, tunggal adda relocation sites, dida met kayat. Adayo kano ken awan pagkuartaan. Susme. Gimas ketdin a biag nia, apo? Pinanawanda ti sanikuada kadagiti nagtaudanda a probinsia. Napanda kano nagbirok iti balitok iti siyudad. Nagbalinda met a problema ti gobyerno. Amangan ta kayatda ti BALITOK A BALAY, HE HE. No ditoy Baguio, Benguet ken Cordillera... dikami apo PASAWAY. Adu ti aponmi malaksid kadagiti um-umay met a dita NCR a maki-Paskua, maki-Holy week ken maki-Valentines day a kumalbit ken umisem kadakayo. No adda man dagiti akin-kukuna... amangan ta saan a taga Cordillera. Mayat no mapagawid dagiti sukir dita Metro Manila. Kayatda laeng ngamin ti maawagan a taga-siyudad wenno immasidegda kano idiay Malakanyang. Adayo a naim-imas ti BORBORAN a SAYOTE ditoy probinsiya ngem dita AGKALKALBO a sayoteyo dita baba. Kasta aya? Di uray idamagtayo ken ni Apo Nestor F. Sinno? Ni Gob a manangipateg kadagiti taga-Benguet, niakayo met.
***
Malagipyo kadi ti napasamak a PHILHEALTH RUN idi Pebrero daytoy a tawen? Adu dagiti simmuporta a timmaray ken nagpataray. Ulitenmi manen ti kudos. Ngamin itay laeng kallabes a June l4,2013, nai-yawaten ti tulong wenno share ti Helping Hands, Healing Hearts Ministries, Phils. Inc... manipud PhilHealth. Naggatad daytoy iti P574,762.00 idinto ta kasta met laeng a gatad ti napan iti nasyonal a benepisyaryo. Immabot iti Pl,l49,524.00 ti proceeds ti Baguio City Leg. Kudos manen kadagiti simmuporta nangruna kadagiti timmaray, saan laeng a ditoy Cordillera no di ketdi iti sapasap a pagilian. Iti daytoy a taray…nagtalek ti Philhealth iti E-Carta Media Productions & Promotions babaen ti Tambalan Program da Eddie Carta ken Jimmy Luzano kas media partners. Iti nagan daytoy nga espasyo, ti inkam panagkurno. Addanto manen pataray inton umay a June 30 para iti nalinis a panagsirbi dagiti taga-gobyerno babaen ti gannuat ti DILG.
***
Nalpasen ti Comelec Gun Ban. Immabot iti 3,695 dagiti arestado a violators. Kudos apo! Ditoy laeng Cordillera, babaen iti report manipud iti opisina ni Gen. Benjie Magalong, Pro-Cor director... adu dagiti nakasuan. Kayatna a sawen, dida nagbaybay-a iti rebbengenda. Kinapudnona, kalkalpas pay laeng ti eleksiyon, nakasangoda manen iti baro a responsibilidad... alerto-matutudo. Inrugin ti Pro-cor ti Municipal Response Team orientation ken preparedness meetings. Kudos manen apo Magalong. Kasta ti addang... saan a saka laeng ti umaddang no nalugitanen ti dapanna. Kararag: sapay koma ta awan dagiti didigra a sagrapen manen ti rehiyontayo iti daytoy a panawen. Adu ngaminen dagiti kalamedad ket ditayon kayat a madalapus manen. Nangruna ket adun dagiti leksiyontayo iti relief operations gapu kadagiti buklis kada buwakaw a kailiantayo. Arasaas: sapay koma ta dida tubuan iti LETTEG iti sellang ken kilikilida. Di uray man AGLETTEGDA idiay KUADA tapno agnakemda, pwa!
***
Nagbalin manen a kontrobersiya ti pannakaalad ti Burnham Park. Ta apay manen? Dida kayat a masaluadan dagiti Park Goers? Dayta ket ti alsemna. Agaramidka iti pagimbagan ti kaadduan…adda met dagiti kontrabida. Kunada, kastoy kitinggo kital. Kidag: apay ngata no datayo a kanayon a kontra ket datayon ti mangaramid iti kayattayo a pagimbagan ti ili? Kayattayo ngata? Adu ngamin dagiti natarabit wenno sumanao... ngem dida met ngarud kayat ti tumulong iti proyektos ti gobyerno. Adda dagiti palapal a palapal iti gobyerno, nakamuttalengda met ngarud. No koma ta agtitinnulongtayo laengen, maymayat. Tay kunada: agiinnappros. Kudkudem ti nagatelda, ta kudkudenda met ti nagatelmo. Ti narigat no kanayonka metten nga AGGAGATEL... Ti narigat no nainsigudanen ti gatel ti dilam, kabsat... agmulomogkan ta sabali daytan. Amangan ta nasudakka iti NAGATEL dita ig-igid. Kunada ngarud: no agsukkilka... tay dika pakaisagmakan. Nagadu dita a CONDOM! Nalpas ti puli, sabali manen ti naturongmi apo. Sori!
***
Itay laeng nabiit, 13 ti natay iti aksidente ti lugan idiay Buguias. Sinaruno ti maysa met a Pastor a naaksidente dita Kennon Road. Ti imasna... kasla awan kano metten karga ti petakana a kuarta. Ne, apay ngay? Adda ngata nangala? No adda... nagawan ket a konsiensiyanan ta natay langaruden diay biktima, takawam pay? No apay ketdi... ta adda dagiti kasta nga eksena. Imbes a tulongantayo dagiti mabiktima, intay pay laeng takawan wenno gundawayan. Dayta ti gapuna no apay a marigatan dagiti otoridad a mangbigbig kadagiti biktima. Naitarayen dagiti mabalin a mangitudo iti kinasiasinoda. Daytoy man ti nakakaskas-ang nga aramid. Matmatayen, inka pay laeng irurumen imbes koma a tulongam. Lagip: adda manguk-uksot iti relo ti maysa a biktima idi kellaat a nagsao daytoy – HOY RELOK DAYTA. NABIAGAK PAY! Ala ket kadagiti kailiantayo nga adun ti inda natultulongan kas koma kadagiti Rescue ken Medical groups kas koma iti 911 on Call, BB Picag ,EMS ti BFD, Brigada ti Kapulisan ken OCD ken adu pay... KUDOS KADAKAYO APO!
***
Balik-Eskuwela manen. Saan laeng a ti K12 ti nainayon a baro iti linya ti edukasyon no di ketdi ti naigiddan a linteg kontra iti Bullying. Makaalarma met ngaminen dagiti eksena ti Bullying saan laengen nga iti Internet wenno cyberspace no di ketdi kadagiti pagadalan. Nainpanawenan ti paglintegan ta di met kaasi dagiti biktima. Iti ababa ken praktikal a pannarita... ti bullying ket direkta a PANANGPABAIN, PANANGIRURUMEN, PANANGMULIT-DAYAW, PANANGUYAW, PANANGBASTOS ken adu pay a kanaigna nga aramid. Kuna dagiti eksperto... dagiti agar-aramid ti kastoy ket dagiti tao nga aginkukuna a siga wenno isuda laeng ti nalaing uray saan met. Tapik dagiti otoridad: isaklang wenno ikkan iti pagnakman dagita nga agar-aramid iti bullying iti legal a pamkuatan. Awan manen ispasyo apo... Adios mi amor, ciao mabalos.