USA ka dako nga isda nga gibanabanang dunay 200 ka kilo ang gibug-aton ang gidagsa sa baybayon sa Punta, Macabalan ning siyudad Biyernes mga alas 6:30 sa buntag.
Si Teodoro Baculod Jr., inspector sa Bureau of Fisheries and Aquatic Resources sa Northern Mindanao (BFAR-10) nga maoy nisusi niini, nitawag sa maong isda nga “sun fish o moon fish.”
Gibutyag niini nga walay local name nga ilang mahatag sa dakong isda tungod kay talagsaon lang kining mapadpad sa nasod sa Pilipinas ug sagad kini nga klase sa isda makita sa Europa.
Pasabot ni Baculod nga usa sa ilang nakita nganong niabot kini sa baybayon sa siyudad tungod sa kaluya niini ug katigulangon.
Gipasabot sab niini nga ang mga isda kung adunay bation sa ilang lawas, magpadaplin ug moabot sa baybayon tungod kay posibleng magpatabang labina gyod sa mga isda nga susama niini ang kadak-on. Daw ang maong isda dili endangered specie.
Matud niini nga adunay mga tawo nga nagpasabot nga gusto nilang lutuon ang maong isda apan nipahimangno kini sa mga residente sa dapit nga dili kini mahimong kaunon tungod kay adunay parte sa lawas niini nga posibleng makahilo.
Gawas pa sa kadelikado labina nga wala pa masuta kung unsa gyod ang hinungdan nganong namatay ang maong isda ug dili kini kumon sa nasod.
“Dili sila pwede mokaon ani kay dili ni kumon nga isda ug adunay parte sa isda nga adunay toxic. Wala pa sab nato nahibaloan unsa iyang gikamatyan,” butyag ni Baculod.
Gihulagway niini nga aduna kini katas-on sa sobra sa usa ka dupa ug kalapdon nga tunga sa dupa.
Matud ni Baculod nga kini ang ikalima nga higayon nga adunay napadpad nga isda dinhi sa baybayon sa siyudad ug pulos mga talagsaong klase sa isda.
Sa pagkakaron gikatakdang ilubong ang maong isda sa area ra usab sa Macabalan samtang adunay parte nga gikuha niini aron ipadala sa kaulohan ug masusi kung unsay hinungdan sa kamatayon niini.