DUNA nay pinal nga listahan sa mga 'outstading athletes' nga pasidunggan sa 19th So Kim Cheng Sports Foundation Awards Night ugmang adlawa didto sa Luzon Ballroom sa Grand Regal Hotel.
Moabot lang sa 18 ka events gikan sa 20 ka miyembo sa Davao City Sports Council Inc. ang mipasa sa ilang nominasyon.
Sila si Palarong Pambansa Arnis medalist Anthony William Ceniza ug Jennlyn MOrcillo, tracksters Adrian Linao ug Charito Bajuyo, basketbolista Jhaystone Oquijas ug Charissa Mae Cuevas, bodybuilder Elaquim Balbero, boxer Lamberto Catipay jr. chessers John Ray Batucan, Ella Grace Moulic ug Dhona Yngayo ug duckpin bowler Joel Pamaran mao ang pipila sa hatagan sa award nga dunay nagkadaiyang daug gikan niadtong Hulyo 2012 hangtud Hunyo 2013.
Sila Langie Mae Meder sa athletics ug Earl Ryan del Socoro sa baseball maoy giilang 'athletes of the year' samtang si chess Fide Master (FM) Austin Jacob Literatus mahatagan og 'Hall of Fame' award.
Ang magsuong sila Manuel ug Edgardo Grandeza makadawat sa sports leadership awards.
Mahatagan og plaques of recognition ang Phoenix Petroleum Philippines, Pilipinas Shell Petroleum Corporation, Kichijoji Lions Club of Tokyo, Heartychem Corporation, Security Bank Corporation, Atlas Fertilizers Corporation ug Columbia Computer Center human nga misuporta sa nagkalain-laing sports program sa siyudad.
Ang outstanding coaches mao sila Jonathan Tan Vanta ug Vincent Ryan Sarabia.
Mamahimong guest speaker si Mayor Rodrigo Duterte samtang gilauman sab nga naa sila Vice Mayor Paolo Duterte ug Sports Development Division of the City Mayor's office (SDD-CMO) officer in-charge William 'Butch' Ramirez sa kalihukan aron iselebrar ang adlaw'ng natawhan sa mipanaw nga sports patron nga si So Kim Cheng. (MLSA)