HUMAN malangkat ang No. 1 spot, gitutokan ug gipreparahan karon og maayo ni Gilas Pilipinas coach Chot Reyes ang ilang duwa batok sa gikahadlokan nga Kazakhstan nga maoy ilang makontra karong alas 8:30 sa gabii sa knockout quarterfinal playoffs sa nagpadayon nga 27th Fiba-Asia Championships sa Mall of Asia Arena.
Ang Pilipinas-Kazakhstan tussle mosunod sa panagkombati tali sa defending champion China ug Chinese-Taipei nga sugdan sa alas 5:45 sa hapon.
Gihulagway ni Reyes ang Kazakhstan nga usa ka makuyaw nga kaatbang tungod kay gawas nga dagko aduna pa gyud kini maayong pointguard ug maayo usab mangitsa sa gawas nga bahin.
“Now we’re going to talk and prepare about Kazakhstan. We know how dangerous Kazakhstan’s team is. They’re tall, they’re great shooters, and they’ve got a great point guard,” paghulagway ni Gilas Pilipinas coach Chot Reyes sa Kazahkstan.
Gikataho nga ang Kazahkstan gihamok og mga injuries diin tulo sa mga sinaligan niini posibling dili makaduwa.
Ang two-time champion ug title favorite Iran maoy moabli sa crossover playoffs sa alas 3 sa hapon batok sa Jordan sa duwa nga gihulagway nga rematch sa ilang 2011 quarterfinal showdown.
Niadtong higayona, gipakaging sa Jordan ang inilog nga Iran, 88-84.
Ang Korea ug Qatar ang magtakos usab sa laing quarterfinal match sa alas 10:30 sa hapon.
Karong buntag, ang Bahrain makigsangka sa Hong Kong sa alas 10:30 sa buntag dayon sundan sa Japan-India encounter alang sa 9th ngadto na sa 12th placers.