POSIBLING ilakip usab sa pagpatawag sa Ombudsman si kanhi kongresista Antonio Cuenco aron pagkuha sa iyang habig ug ingon man paghatag og igong katino-an kalabot
sa kontrobersiyal niyang pork barrel scandal sa Vicente Sotto Memorial Medical Center.
Kini sa dihang sugdan na sa Visayas Ombudsman ang pakisusi sa nahisgutang pork barrel scandal nga naglambigit sa pipila ka mga opisyal sa Sugbo, partikular sa Vicente Sotto Memorial Medical Çenter.
Ang kanhi kongresista giingon nga migahin sa VSMMC og pundo gikan sa iyang priority development assistance fund (PDAF) o gitawag og pork barrel nga magamit sa mga pasyente nga way igong ikapalit og mga tambal niadtong tuig 2001 ngadto sa 2006.
Upat ka mga opisyal sa maong tambalanan ang gitumbok sa Commission on Audit nga nihatag sa PDAF ni kanhi Kong. Antonio Cuenco nga moabot og P3.3 milyones ngadto sa mga ghost patients pinaagi usab sa mga peke nga mga dokumento.
Kini naglakip nilang retired hospital chief Filomena Delos Santos, retired chief administrative officer Josefa Bacaltos, chief pharmacist Nelanie Antoni ug hospital accountant Maureen Bien.
Matod ni Deputy Ombudsman for the Visayas Pelagio Apostol nga gumikan sa kadako sa kantidad nga na-usik ug wa magamit sa saktong tuyo, angayan lang gyud nga kini susihon.
Pagkatangtang gikan sa trabaho maoy posibleng silot nga ipahamtang ngadto sa mapamatud-an nga nalambigit sa kontrobersiya samtang di usab makalingkawas sa kriminal nga tulubagon kadtong mga naka-retire gikan sa katungdanan.
Pahimangno ni Apostol sa mga kongresista nga i-monitor ang gipadulngan sa ilang PDAF aron pagsiguro nga magamit kini sa saktong paagi. Astra Zina D. Logarta