ARON masigurong hapsay ang pagpahiluna sa mga vendors ug luag ang agianan sa mga tawo sa sidewalk, gipatuman na niadtong Byernes ang istriktong one-third, two-third policy sa dakbayan.
Sa pagpatuman niini, gironda sa demolisyon team ang mga nag-unang kadalanan sa siyudad aron masuta kung dunay malapason sa ordinansa.
Gihimo ang ronda subay sa hangyo ni Davao City Mayor Rodrigo Duterte nga tumanon ang one-third, two-third policy sa mga sidewalk vendors.
Tumong sa mayor nga mahatagan og luag nga agianan ang katawhan human nadawat ang daghang reklamo sa iyang buhatan labot sa guot nga sidewalk.
Sa nakalabay nga bulan, gitapok sa mayor ang mga negusyante nga naninda sa mga sidewalk ug gipasabot sa patakaran nga ipatuman sa lokal nga kagamhanan.
Subay niini, si Davao City Drainage Maintenance Unit Chief Yusuf Jimlani uban ang mga sakop sa demolition team milibot sa dalang Uyanguren aron susihon kung mituman ang mga vendors sa sukod.
Human sa Uyanguren, gisunod dayon pag-inspeksyon ang San Pedro Street ug ang dalang Ilustre.
"Matagal na natin silang sinabihan. Alam na nila yung napag-usapan with Mayor Duterte. So, ngayon inspeksiyunin natin kung sumunod ba sila sa line na ibinigay natin," sulti ni Jimlani sa pakighinabi sa Sun.Star SuperBalita.
Dugang sa opisyal nga ilahang kumpiskahon ang mga tinda kung milapas sila sa badlis nga ilang gihatag.
"Kung lalaban at magagalit sila, well, panahon na siguro na madala natin sila sa presinto," panapos ni Jimlani. (Jeepy P. Compio)