MOHATAG og P450 mil nga ganti si Iligan City Mayor Celso Regencia alang niadtong makatudlo sa mga mipusil patay sa usa ka radioman sa Buru-un dakbayan sa Iligan.
Si Fernando “Nanding” Solijon, usa ka hard-hitting commentator sa Public Affairs Program nga “Sandiganan” sa Love Radio sa siyudad sa Iligan, gipusil patay niadtong Huwebes mga alas 10:30 sa gabii.
Duha ka suspetsado, kinsa nagsakay og motorsiklo, ang mipusil patay sa biktima, hinungdan nga nakaangkon kini og mokabat 13 ka samad sa lain-laing parte sa lawas.
Gawas nga komentarista sa radio, kolumnista usab kini halos usa ka tuig sa Sun.Star SuperBalita Cagayan de Oro.
“Sandiganan” gihapon ang gidala niini sa opinion section sa SuperBalita ug sagad sa mga sinulat niini moatake ug mobirada ngadto sa mga politico nga adunay hiwi nga kalihokan sa Iligan.
Pipila sa mga gipangsulat niini mao ang suliran nga giatubang sa nasud karon apil na ang mga kabatan-onan nga nalambigit sa mga dagkong kaso apan dili mabilanggo gumikan sa balaod nga Juvenile Justice and Welfare Act nga gidili ang pagdakop sa minor de edad.
Miyawyaw sab kini batok sa usa ka abusadong polis nga kalit lang mipospos og pistola sa usa ka hubog nga lalaki.
Si Solijon nailang isog kaayo nga mongalan gyod sa mga tawo nga nakalapas sa katungod ug niadtong kusog mandaog-daog. Gibiradahan usab niini ang mga protector sa illegal nga druga ug uban pa.
Daghan sa mga sakop sa prensa ang wala malipay sa linuog nga pagpatay sa komentarista labina tinguha lamang niini ang pagbutyag sa kamatouran.
Kasamtangan, gitun-an pa sa kapolisan kung unsa ang motibo sa pagpusil sa biktima.