IPANG-DEPORT ngadto sa ilang mga nasod ang 69 ka mga langyaw nga nasikop sa gihimong anti-cyber fraud operation sa kapulisan sa Central Visayas inabagan sa Bureau of Immigration.
Apan ang kapulisan moila ug mogukod sa ilang local contacts kay di sila motuo nga wa kiniy kakunsabo dinhi.
Sa 69 nga nadakpan, 43 niini mga Taiwanese samtang 26 ang mga Chinese, 17 kanila mga babaye nga maoy magsilbing call center agent.
Silang tanan mag-atubang og kasong kalapasan sa Republic Act 8484 kun Access Device Regulation Act of 1998 dinhi sa Pilipinas nunot sa ilang paggamit sa mga kagamitan sama sa telepono ug computers sa ilegal nga kalihukan dinhi sa nasud.
Apan matod ni Chief Supt Prudencio Bañas nga bisan kon duna silay tulobagon dinhi sa Pilipinas, apan kay dako sila og kaso nga atubangon sa nasud sa Taiwan ug mainland China, ug gitakda silang i-deport sa ilang tagsa-tagsa ka mga nasud.
Giimbestigar usab sila uban sa mga sakop sa Bureau of Immigration ug mga opisyal sa embahada sa Taiwan aron makuhaan og mga impormasyon alang na sa paghikay sa mga papeles pagpalarga sa maong mga langyaw pagawas sa nasud.
Lakip sa gisusi ang mga computer, cellphone ug ubang gadget alang sa pagpanawag sa ilang gipang-ilad.
Matod ni Bañas nga nagtuo sila nga dunay lokal nga mga kontak ang maong mga suspek nga usa sa gitinguha nga ilang mailhan.