NALANTAWAN sa usa ka opisyal sa Artsidyosesis sa Sugbo nga modaghan ang mopetisyon sa pagpawalay bili sa ilang kaminyuon gumikan sa reporma nga ipatuman sa Santo Papa nga himuon nga sayon ang proseso sa annulment sa simbahan.
Si Msgr. Esteban Binghay, episcopal vicar ug usa sa mga priest-judge sa artsidyosesis, niingon sa bag-ong proseso nga ipatuman ni Pope Francis kinahanglan nga magdugang og daghang huwes nga mga pari aron dili modaghan ang mag-ung-ong nga mga aplikasyon alang sa pagpawalay bili sa kaminyuon.
Siya nibanabana nga moabot sa 50 ka aplikasyon ang nag-ung-ong karon sa First Instance.
Ang kausaban nga ipatuman sa Santo Papa mahimong opisyal nga kabahin sa Code of Canon Law sa simbahan sugod sa Disyembre 8 o ang pagsugod sa Year of Mercy.
Sa gipagawas nga “motu propio” documents sa Santo Papa, gitangtang na niini ang automatic appeal o ang gitawag og second review sa Second Instance Court sa dili pa ipawalay bili ang kasal.
Sa simbahan, duha ka mga korte ang modungog sa application for declaration sa nullity sa kaminyuon, ang First Instance o korte sa artsidyosesis nga gilangkuban sa tulo ka mga pari ug gipangulohan ni Msgr. Raul Go ug ang Second Instance sa kaulohan nga gipangulohan ni Archbishop Emeritus Oscar Cruz, isip maoy chief justice.
Si Binghay nipasabot ang First Instance maoy moimbestigar ug modungog sa aplikasyon. Kon paboran ang aplikasyon o ipawalay bili niini ang kasal, kini iduso sa Second Instance alang sa pag-review sa pagkompirmar sa deklarasyon sa pagwagtang sa bili sa kaminyuon.
Kon dili paboran, kini dili na iduso sa Second Instance apan ang petitioner mahimong moapilar sa First Instance alang sa reinvestigation.
Kon dili gihapon paboran ang apelasyon, ang petitioner mahimong mosang-at niini sa Rota o sa Roma nga maoy labing taas nga korte.
Sa bag-ong proseso nga ipatuman sa Santo Papa, kutob na lang sa First Instance ang petition kon kini paboran, apan kon dili, mahimo gihapon kini iapilar sa petitioner alang sa reinvestigation.
Si Pope Francis nihatag og gahom sa mga obispo nga mapadali ang paghatag og annulment sa espesyal nga sirkumstansiya. Pananglitan kon giabuso ang asawa o kon dunay pagluib nga nahitabo.
Apil sa ipausab sa Santo Papa ang paghimo nga libre sa annulment gawas lang sa gamay nga bayranan sa administrative fees.
Si Msgr. Binghay niingon sa kasamtangan nga sitwasyon, ang magtiayon nga gusto magkabuwag mobayad og P5,000 nga filing fee ug moabot og P100,000 ang gastuon apil na ang bayranan sa Second Instance court didto sa kaulohan.
Sa bag-ong proseso kinahanglan sulod sa 45 ka adlaw, makumpleto na og imbestigar ug husay ang petition sa magtiayon nga gustong magbuwag, sukwahi karon nga molungtad og usa hangtod sa duha ka tuig sa First Instance pa lang.