NAUKAY ang mga residente labi na ang nagpuyo dapit sa baybayon human nakita ang dakong Sperm whale nga gidagsa sa Kinoguitan, Misamis Oriental niadtong adlawng Biyernes.
Ang whale nga anaa na sa pagkadugta adunay gitas-on nga 15 ngadto sa 19 metro ug kalapdon nga 3 ngadto sa 4 metro.
Gituohan nga posibleng naigo kini sa tapiraw sa barko hinungdan nga aduna kini samad sa tiyan.
Sa obserbasyon sa usa ka eksperto gituohang gituyo kini og samad labina kay adunay bahin sa lawas sa maong whale nga pwedeng mabaligya.
Ang patayng lawas sa sperm whale nga nakit-an sa mga residente sa baybayon nga bahin gilubong sa dapit niadtong adlawng Sabado.
Si Misamis Oriental Governor Yevgeny Emano nagplano nga magtukod og Task Force Bantay Dagat nga maoy mosusi ug motan-aw sa kadagatan tungod sa maong nahitabo.
Apan gipasabot niini nga kinahanglan kini og saktong ekipo.
Matud ni Emano nga angayan maprotektahan ang susama niini nga mga endangered specie labina nga nagpadaplin ang giant sperm whale nga nakita niadtong Biyernes sa Kinoguitan.
Daw nagpasabot kini nga bout niining mangayo og tabang sa katawhan nga maluwas.