PORMAL nga giablihan kagahapon sa buntag atol sa flag ceremony sa City Hall ang kasaulogan sa Children's Month sa tibuok bulan sa Oktubre.
Nihural usab ang mga bag-ong sakop sa Executive Committee sa Council for the Welfare of Children (CWC) nga napili sa asembliya nga gipahigayon niadtong niaging bulan.
Sa gihapon si Mayor Rody Durterte ang chairperson ug si Konsehal Leah Librado-Yap ang iyang Action Officer.
Ang UCCP-Pag-ugmad sa Kabataan ang Vice Chair nga nagpresentar sa NGOs, apil sab ang Talikala ug Tambayan, Kaugmaon Foundation, Kamalayan Foundation lakip ang nga line agencies sa gobyerno sama sa CSSDO, CHO, DILG, DepEd ug uban pa.
Nag-una ang Davao sa mga naningkamot nga proteksiyonan ug ipalambo ang katungod sa mga bata sa Pilipinas.
Busa sa ikatulo ka higayon, nakadaug na usab kita sa 2012 Presidential Search for the Most Child Friendly City sa Chartered City category.
Atong napildi ang mga siyudad sa Pasay, Paranaque, Olongapo, Caloocan, Manila ug uban pa.
Sa pagkatinuod, dali rang daugon sa Davao City ang ingon niining indigay kay plastada na kaayo ang atong mga balaod, programa, badyet ug serbisyo alang sa kabataan.
Ang nagpabilin lang tunok sa Davao mao kining padayong pagpamatay o extrajudicial killings (EJK) nga apil sa biktima ang mga bata.
Ingon pa sa daang datos sa Unicef nga 1 sa matag 9 ka mga biktima sa EJK sa Pilipinas, ilabi na sa Davao kay bata nga nagpangedaron og 17 anyos paubos.
Apan sa laing bahin, makita man nato ang paningkamot sa mga line agencies ug NGOs sa ilang pagtinabangay nga maprotektahan ang mga batang Dabawenyo.
Busa sugod niadtong Septyembre 8, nagsugod na ang Protection Committee sa CWC nga gipangulohan sa Talikala sa pagpanday sa proposed "Child Protection Ordinance."
Usa ka Technical Group ang gitukod gikan sa Protection Committee aron maoy mohimo sa maong balaudnon pinaagi sa pagpahigayon og "writeshop."
Apil niini ang Bantay Bata 163, UCCP-Pag-ugmad, DCPO, CSSDO, DILG, CPDO, DepEd, Tambayan, SOS Children's Home, Kabiba, Lingap Pangkabataan ug uban pa.
Ang writeshop gipangunahan sa Luna Legal Resource Center, Inc., ug hayan mahuman ang unang draft karong bulan sa Oktubre.
Kung walay kakulian, posibleng maduso kini sa CWC ngadto sa Sangguniang Panlungsod alang sa first reading karong Nobyembre nga mao usab ang anibersaryo sa ratipikasyon sa UN Convention on the Rights of the Child sa Pilipinas. Gipangandoy sa maong ordinansa nga mahimo nang kinaiya ug programa ang pagprotekta sa kabataan sa tanang ahensiya ug opisina sa gobyerno ug pribadong establisemento sa Davao. Mosuporta ang ordinansa sa bag-ong balaod nga Republic Act 10627 o Anti-Bullying Act of 2013 ug DepEd Order 40 nga maghimo og Child Protection Policy ug magtukod og Child Protection Committee ang matag eskuwelahan aron mapakgang ang abuso ug kabangis sulod sa eskuwelahan.
Ubos sa maong ordinansa, magbutang ang tanang ahensiya og pribadong grupo ug giya sa maayong pamatasan (Code of Conduct) sa ilang mga kawani ngadto sa mga bata nga ilang serbisyohan.
Adunay silot nga ipahamtang sa nakalapas niini sama sa mga nag-unang balaod alang sa bata. "Act now! Children can't wait."