ANG lokal nga kagamhanan sa dakbayan sa Cagayan de Oro nagpagawas na sa bag-ong dagan-trapiko alang sa selebrasyon sa kalag-kalag karong Nobiyembre 2.
Sa gipirmahang Executive Order 074-2013 ni Mayor Oscar Moreno, tanang klase sa sakyanan lakip na ang mga trisikad ang ginadili sa pagsulod gikan sa Bolonsiri Road paingon ngadto sa sementeryo bisan pa gikan sa Camaman-an-Bolonsiri Road junction.
One-way traffic usab alang sa tanang matang sa behikulo nga molatas sa Camaman-an Road gikan sa dalan Hayes ngadto na sa Bolonsiri junction, ug tanang dalan paingon sa junction sa Carmelite church.
Dugang pa sa kasugoan, one-side parallel parking usab alang niadtong mga hagkap nga sakyanan sama sa motorsiklo, diin mao lamang ang gitugotan nga moparada gikan sa may dalan Hayes ngadto na sa Bontong Road Area, lakip na usab kadtong gi-deklarar sa Roads and Traffic Administration (RTA) nga one-way traffic routes.
Gitataw usab sa kasugoan sa mayor nga tanang matang sa mga dagkung sakyanan dili mahimong makaparada sa mga dalan nga gi-deklarang one-way traffic diin mahimong makaparada ang mga motorsiklo.
Apan sa dalan padulong sa Sitio Paglaum, Camaman-an, gi-deklarar nga “No Parking” bisan asa nga kilid aron makahatag lugar sa mga motorist padulong ug panaug sa Barangay Indahag.
Wala usab gitugot ang pagpasakay ug pagpanaug sa mga pasahero alang sa tanang matang sa salakyan gikan sa Camaman-an-Bolonsiri Road junction 10 metros gikan sa maong junction.
Mahimo lamang sila magsakay ug magpanaug ug pasahero sa may Camaman-an Road.
Ang mga motorela nga nagbiyahe sa Camaman-an route gitugotan paingon sa Sitio Bontong.
Apan ngadto sa uban nga nagbyahe gikan sa laing rota mahimo lamang makalatas hangtud lamang sa Borja Road ug pagawas ngadto sa Carmelite Road.
Sa Bulua Public Cemetery ug Greenhills Memorial Park sa Barangay Bulua, one-way traffic sa tanang klase sa salakyan nga naglatas sa Macapagal Drive gikan sa Bulua National Highway ngadto sa Greenhills Memorial Park entrance.
Mahimo lamang silang mosulod sa maong mga sementeryo agi sa Terry Hills panaug sa Apovel Subdivision, ngadto na dayon sa Barangay Patag isip ilang gawasan.
No entry alang sa mga public utility vehicles, motorela, trisikad nga nagbyahe gikan sa laing rota sa dakbayan paingon sa Macapagal Drive gikan sa national highway paingon sa Bulua Public Cemetery ug Greenhills Memorial Park.
Apan gawas lamang niadtong regular nga nagbyahe paingon sa Scions subdivision, Mindanao Homes, Soldier’s Hill ug Canitoan-Pagatpat area mahimong mobyahe agi sa Macapagal Drive.
Sa Divine Shepherd Memorial Garden, no parking alang sa tanang salakyan bisan asa nga kilid sa national highway 50 metros gikan sa entrance nga dalan sa maong pribadong sementeryo.
Sa Chinese Cemetery ug Oro Garden Memorial Park, no parking usab alang sa tanang salakyan sa bisan unsang kilid sa Masterson Avenue 50 metros gikan sa ganghaan sa duha ka sementeryo.
Ubos usab sa kasugoan ang mga salakyan nga gitugot pagsulod-gawas sa tanang ginadili ug gitugotan nga dalan mao lamang ang salakyan sa mayor ug opisyales sa dakbayan, mobile patrol sa kapulisan ug kasundalohan, RTA mobile patrol, host barangay mobile vehicle, fire trucks, ambulansiya ug Oro Alert service vehicles, parish priest service vehicle, tanang government vehicles nga dunay clearance sa RTA ug host barangay, ug media-marked vehicles.