STA. MARIA, Davao Occidental - Giposasan sa kapulisan ang usa ka lalaki nga suspek sa paglugos sa usa ka 14-anyos nga babaye didto sa Barangay Basiawan.
Subay sa taho, nasikop si Bryan Diamolon, 18, ulitawo ug laborer, pasado alas 12:00 sa tungang gabii niadtong Martes.
Matud ni PO1 Flordelina Lamparas, sa Women and Child Protection Desk (WCPD), si Diamolon maoy gitudlong nanglugos sa biktimang si Joy (tinuod nga bansagon gitago), 14, ug molupyo sa maong lugar.
Gihulagway ni Lamparas nga gikan ang biktima sa videokehan sa maong lugar dihang gikuyogan sa suspek pauli sa ilang balay.
Nagpakaaron-ingnon si Diamolon nga mohatud sa biktima, apan pag-abot sa ngiob nga lugar, iya dayong gigakos ang menor ug gisumbag sa nawong lima ka higayon.
Dihang natumba ang dalagita sa yuta, didto na nakahigayon ang suspek sa iyang dautang tinguha pinaagi sa paghubo sa underwear dayon gipahimuslan.
Gidason sa WCPD nga nasikop na ang suspek kinsa hubog pa niadtong orasa. (Orlando B. Dinoy)