TALAGSAON nga matang sa langgam ang nasigpatan sa lapokon nga bahin sa 1,028 ektarya nga luna sa Olango Island Wildlife Sanctuary sa dakbayan sa Lapu-Lapu.
Kini ang ikaupat nga higayon nga napalgan ang “black faced spoonbill” dinhi sa nasod diin ang labing uwahi niadtong Enero 6 ning tuiga didto sa Camarines Sur.
Sa report ni OIWS Assistant Protected Area Superintendent Reginaldo Bueno ngadto kang Department of Environment and Natural Resources 7 Regional Executive Director Dr. Isabelo Montejo, siya nipahibawo nga si Genaro Soon, iyang sakop, nakabantay sa usa ka “black faced spoonbill” o Platalea minor, nga nangaykay sa lapuk ug nangita og pagkaon uban sa mga Chinese egret niadtong Nobiyembre 26 ning tuiga.
Ang maong langgam usa ka klase sa migratory bird.
“The recent sighting of this rare species in OIWS will become a priority in terms of monitoring the population, period of stay, and enforce strict protection,” nagkanayon si Montejo.
Matod niya ang maong klase sa langgam, gikonsiderar na nga endangered ug nalakip sa listahan sa International Union for Conservation of Nature and Natural Resources (IUCN).
Siya nidugang sagad ang breeding sites niini naglakip sa western coast sa Korean peninsula sa North ug South Korea, Liaoning province sa mainland China ug Tumen estuary sa Russia.
“Being classified as endangered species, they are highly protected from exploitation and abuse in most countries and it is illegal to collect, harm or kill them,” dugang ni Montejo.