DIGOS CITY -- Pormal nga gi-inagurahan sa Davao del Sur Electric Cooperative (Dasureco)
ang 15 megawatts nga modular power plant kagahapong adlawa.
Si Engr. Godofredo Guya, Dasureco general manager, nagbutyag nga ang planta maoy
pinaka-epektibong solusyon aron nga di na matilawan sa katawhan ang taas nga brownout sa
sunod tuig tungod sa matud pang gilaumang pagkuwang sa suplay sa enerhiya dinhi sa isla sa
Mindanao sa tuig 2014.
Matud ni Guya dako sab og ikatabang sa ekonomiya sa probinsiya ang pagmuntar sa
generator sets.
"Both provinces of Davao del Sur and Davao Occidental ang maka-benepisyo niini so di na
maapil sa brown-out," tin-aw niya.
Apan giangkon ni Guya nga adunay pag-usbaw sa singil sa kuryente sa kantidad P1.50
matag kilowatt hour.
Sama pananglit kon ang usa ka konsumante nagbayad og P100 matag bulan, mahimo na
kining P130 tungod sa dugang singil.
"I urged the public to minimize their consumption kay ilang balayrunon mag-depende man na
sa running hours nga ilang gigamit," pasabot ni Guya.
Ang ceremonial switching sa generator set gisaksihan sa Davao del Sur Chamber of
Commerce and Industry.
Samtang si Governor Claude Bautista, nga maoy nanguna sa cutting of ribbon, mipaabot sa
iyang pasalamat sa Dasureco sa paghatag og hinanaling solusyon sa kahasol sa katawhan sa
taas nga oras sa brownout.
Sa takna nga mahitabo ang rotational brownout, apektado niini ang serbisyo sa pribado ug
gobyernong buhatan, malugi sab ang mga negusyante ug tanang konsumante sa Dasureco.
Sigon ni Bautista ang generator sets maoy sulbad sa power shortage ilabi na nga saulogon
ang Pasko.
Kahibaloang mi-alokar ang nasyonal nga gobyerno og P4.4 bilyones pinaagi sa Department
of Energy (DOE) aron makapalit og generator sets alang sa Mindanao.
Niadtong Mayo, ang Dasureco milagda og Memorandum of Agreement tali sa Alsons
Consolidated Resources Inc., ug gihuwat nga matugtan sa Energy Regulatory Commission
ang kontrata una namuntar ang instalasyon sa modular sets.
Ang Alcantara-owned power unit mihanyag sab sa ilang Iligan diesel power plant (Mapalad)
aron mahimong short-term solution sa Mindanao power crisis. (Orlando B. Dinoy)