DUHA ka mga dos-anyos nga batang lalaki ang nangaigo sa saag nga bala atol sa pagsaulog sa Bag-ong Tuig sa managlahi nga lugar.
Ang unang biktima nga natala sa Women and Child Protection Desk (WCPD) sa Digos City Police Office mao si Jared Stephen Bacomo, molupyo sa dalang Mabini Superhighway sa Barangay Aplaya, Digos City.
Subay sa taho, saktong alas 12:00 sa tungang gabii sa Enero 1, nadiskubrihan na lamang sa amahan sa biktima nga nagkadugo na ang tuong bahin sa kamot sa bata.
Dali niya kining gidala sa Gonzales Hospital sa dakbayan.
Nasuta sa mga doktor nga naigo og saag nga bala ang kamot sa bata hinungdan nga nasamad.
Apan mapasalamaton ang ginikanan sa bata nga natabang dayon ang ilang anak ug dili sa ulo naigo hayan mameligro ang kinabuhi niini.
Samtang, si Superintendent Querubin Manalang, hepe sa sa DCPO nagmando na sa iyang mga ginsakpan nga subayon ang insidente.
Bisan si Senior Superintendent Ronaldo Llanera, provincial police director, hilabihan ang kapungot human nasayud sa hitabo ug nagmando nga pangitaon gyud sa kapulisan ang suspek nga nagpabuto og armas armas.
Nanawagan sab ang kapulisan ngadto sa publiko nga makig-alayon sa ilang buhatan ugaling nakakita kinsa'y nagpabuto og armas sa lugar niadtong higayona.
Samtang ang ikaduhang bikitma nga naigo sab sa saag nga bala giila nga si Ean James Dimpaso, taga Barangay Poblacion 6, Midsayap, North Cotabato alas 12:15 sa kaadlawon, Enero 1.
Matud sa inahan sa biktima nga si Rosario nga samtang nanan-aw sila og fireworks display gawas sa ilang bay, kalit mihilak ang iyang bata ug nakitang nagkadugo.
Gihiling dayon ni Dimpaso ang anak ug didto iyang nakita nga naigo kini og bala sa armas.
Gidali siya pagdala sa Pisante Hospital ug gioperahan dayon sa doktor aron nga makuha ang bala sa iyang tuong bukton.
Nasayran nga ang bala, gikan sa 22 kalibre nga pistola.
Gidala sab gilayon ang bala sa kapulisan alang sa ballestic test aron masayran kon kinsa ang nanag-iya sa pusil.