GITUOHANG grupo sa acetylene gang nilungkab sa usa ka pawnshop nga nibitbit sa mga alahas ug cash nga nadiskubre niadtong kasaulogan mismo sa Bag-ong Tuig.

Ang Alsons Jewelry and Pawnshop nga nahimutang sa JR Borja St., Cogon ning siyudad sa Cagayan de Oro ang nadiskubreng gibakbak sa gituohang grupo sa acetylene gang human nakita sa maong dapit ang acetylene.

Si Police Senior Inspector Ariel Phillip Pontillas, kinsa hepe sa Crimes against property sa Cagayan de Oro City Police Office (Cocpo), niingon nga planado sa grupo ang pagpanglungkab.

Gibutyag niini nga ang mga suspetsado nag-check in sa Dian Stay Inn nga nahimutang sa Yacapin St. ning siyudad diin nahimutang sa likod nga bahin sa Alsons Pawnshop ug giabangan ang tulo ka mga lawak.

Ang room number 125 maoy ilang gipuy-an sulod sa upat ka adlaw ug ang pansayan nga bahin niini maoy ilang gibakbak.

Ang bangag igo lamang makasulod ang usa ka tawo nga molapos sa Everbest Building diin tupad niini ang Alsons Pawnshop.

Giabangan usab sa mga suspetsado ang room 123 ug 126 aron posibleng walay makadungog kanila tungod kay anaa man sa taliwala sa maong mga room ang room 125.

Ang empliyado sa Dian Stay inn niingon nga usa ka Denis Faisan ang ngalan sa nagparehisrtro sa nag check-in apan gitouhan nga alyas lamang kini sa giingong upat ka suspetsado.

Ikaduha pa lamang ka adlaw sa ilang pag-abang gibayran na nila daan ang kantidad nga P6 mil alang sa upat ka adlaw nga pagcheck-in niadtong petsa 28 sa Disyembre.

Dugang butyag ni Pontillas nga dihang nabakbak na sa mga suspetsado ang dalan gikan sa Dian, paingon sa Alsons nagmalampuson sa ilang tinguha ang mga suspetsado human basi sa ilang record nakuha ang duha ka vault nga adunay sulod pulos mahalon nga alahas, mga gamit ug cash nga P300 mil.

Dili masulti ni Pontillas ang kinatibuk-an nga kantidad sa mga alahas apan migawas ang taho nga daw P10 milyones o sobra pa niini ang kantidad sa maong mga alahas hinuon padayon pa nga gisuta gikan sa tigdumala sa maong pawnshop.

Ang mga himan nga gibyaan sama sa barina, bara, acetylene ang gitouhang gigamit sa pagpangbakbak apan giingong migamit pa og oxygen ug gasul nga gamay.

Nasuta nga walay trabaho ang Everbest ug ang maong pawshop sugod niadtong Dsiyimbre 30 ngadto niadtong petsa uno sa Enero.

CCTV

Sa inisyal nga pagtan-aw ni Pontillas sa closed-circuit television camera (CCTV) sa Dian Stay Inn gibutyag niini nga dili pa gyod maklaro ang hitsura sa suspetsado kay nagkalo ang suspetsado ug anaa sa ibabaw nga bahin ang CCTV.

Hinuon malaumon kini nga maila gyod ang mga suspetsado pinaagi sa CCTV footages ug ma enlarge kini.

Gipasalig usab niini nga dili mohunong sa pag-imbestigar matumbok lamang ang mga suspetsado sa pagpangransak.

Gihangyo lamang niini ang kooperasyon sa tigdumala sa maong pawnshop labina gihulagway niini nga tahado pa kanila samtang nagsugod sila sa imbestigasyon.

Apil sa miimbestigar sa kaso ang Police Station 2 (PS2) sa Cogon.

Nipahimangno na

Gibutyag usab ni Police Chief Inspector Lemuel Gonda kinsa hepe sa Operation and Plans Branch sa Cagayan de Oro City Police Office (Cocpo) nga niadtong weekend miabot kanila ang report nga adunay presensya sa grupo sa acetylene gang ug ila nang gimandoan ang tanan nga mga hepe sa tanan police station sa pulis nga pahimangnoan ang tanan nga mga establismento sa posibleng pagpangransak nga mahitabo.