MISAKA na usab og maayo ang gidaghanon sa mga biktima sa pabuto sa pagsugat sa Bag-ong Tuig. Ang nakaparat kay sagad sa mga biktima mga bata nga nagduwa-duwa.

Tinuod kabahin na sa tradisyon sa mga Pinoy ang pagpabuto panahon sa pagsugat sa Bag-ong Tuig, Pasko ug kapistahan ingon man sa uban pang dagkong mga kalihukan.

Sa miaging tuig, minos ang gidaghanon sa nabut­han apan nisulbong og 35 porsyento niadtong Pasko samtang 18 porsyento sa Bag-ong Tuig.

Bisan gud ang Department of Health (DOH) naglibog na kon unsay ilang buhaton aron maglikay na ang publiko sa pagpabuto.

Ang kampanya batok sa pabuto mapakyas kon ang DOH lang ang saligan. Gikinahanglan nga moa­pil ang kapulisan ingon man local government units (LGU) sa kampanya, labina ang barangay officials nga maoy labing batakang hut-ong sa kagamhanan.

Mag-unsa man ang kampanya sa DOH nga naa lang sa radio, telebisyon ug mantalaan nanghadlok unya ang ubang mga buhatan sa kagamhanan wa magpakabana.

Ang kapulisan mao untay mopatuman sa higpit nga pagbaligya sa mga pabuto nga ginadili sa balaud inabagan sa mga barangay tanod.

Apan wa man kini nahitabo base sa grabeng pagpasad sa mga salin sa mga pabuto sa kadalanan sa Sugbo ug pagsulbong sa mga kaso.

Kon ipatuman baya ang balaud ug ordinansa dinhi sa dakbayan nga nagkontrolar sa pagpamaligya og pabuto ug motrabaho lang ang mga awtoridad, di na kinahanglan pa sa DOH nga manghadlok.