BISAN sa mga katalagman ug dakong panghitabo sa nilabay nga tuig, daghang mga rason nga angay gihapon maglipay ug magsadya ang mga tawo ilabi na sa Sugbo, sumala ni Cebu Archbishop Jose Palma.
Alang sa arsobispo ang niaging 2013, tuig sa kasub-anan ug mga luha diin “daghang mga rason mga igsuon sa Pilipinas nagdanguyngoy o nagsubo.”
Sa iyang wali, si Palma namahayag nga daghan og mga rason nga angay magsadya ang mga tawo tungod kay sa 2013, ang imahe ni San Pedro Calungsod ang gibutang sa St. Peter’s Basilica uban sa mga imahe sa ubang mga santos sa simbahang Katoliko.
“Para nato kini usa ka malipayon nga okasyon,” paambit niya atol sa misa sa New Year’s Eve nga iyang gipangulohan sa Cebu Metropolitan Cathedral.
Sa 44 nga gi-beatify niadtong 2000, matod niya, usa pa lang ang na-canonize ug nahimong santos nga mao si Calungsod.
Sa nahitabo nga linog niadtong Oktubre 15 ug bagyong Yolanda niadtong Nobiyembre 8 sa niaging tuig, si Palma nagkanayon nga daghan og nakat-onan nga leksyon ang mga tawo ilabi na ang paghatag og bili sa kinabuhi.
“Tinuod life is short but life is a gift nga angay natong pasalamatan ang Dios,” dugang pa niya.
Siya nipasabot usa ka importante nga leksiyon ang angay hinumdoman sa mga tawo nga mao ang pagpasalamat sa Diyos sa grasya sa kinabuhi nga pinaagi ni Mama Maria nadawat ang kaluwasan ug ang kinabuhi tungod ni Kristo nga iyang anak.
Ang arsobispo nidugang sa pagsugod sa 2014, angay magpasalamat ang katawhan nga nakaabot sila og Bag-ong Tuig.
Ang unang adlaw sa Enero gideklarar sa Santo Papa nga World Day of Prayer for Peace.
Pinaagi sa pagpasalamat sa pag-abot sa Bag-ong Tuig, sumala pa niya, angay mag-ampo ang mga tawo nga mokusog ang paglaom nga maoy bertud aron makalaom sila og maayong mga butang sa 2014.
“Base sa atong paglaom ang atong pagtuo naa ang atong gugma sa Dios,” dugang pa niini.
Atol sa misa, siya nihangyo sa mga nanambong nga mag-ampo alang sa kapahulayang dayon sa kapin 6,000 ka mga tawo nga nangamatay sa super typhoon Yolanda.
Siya niawhag sa katawhan nga gawas kang Mama Maria, moduol usab sila sa mga higalang santos nga atua sa langit ilabi na alang sa pagbangon sa daghang mga trahediya nga naabot sa ilang kinabuhi.