ANG pagka iresponsabli sa mga tawo sa pagpabuto ang gitumbok nga hinungdan sa Department of Health kon nganong daghan gihapon ang mga nabuthan og pabuto sa pagsaulog sa Pasko ug bag-ong tuig karong tuiga kon itandi sa nilabay nga tuig.
Sa talaan sa Regional Epidemiology and Surveillance Unit sa DOH 7 gikan sa Disyembre 16, 2013 hangtod sa Enero 2, 2014, nisaka na ngadto sa 99 ang mga nabiktima sa pabuto sa Central Visayas ug 2 niini ang naigo sa saag nga mga bala.
Mas taas kini og 18 porsiyento kon itandi sa 84 nga mga nabuthan sa samang panahon sa niaging tuig.
Kasagaran sa mga biktima nabuthan og kwitis, piccolo, pirate, sparkler, thick long, triangle ug ubang mga klase sa pabuto.
Sa 99 nga nabuthan, ang labing daghang natala sa Cebu City nga adunay 33, 18 sa Lapu-Lapu City, 11 sa Talisay City, 10 sa Mandaue City, tag 3 sa Danao City ug Dauis, tag 2 sa Balamban, Cordova, Dumaguete City ug Naga City samtang tagsa sa Consolacion, Getafe, Loay, Medellin, Oslob, San Remigio, Sta. Catalina, Talibon, Toledo City, Ubay ug Zamboangita.
Sa maong gidaghanon, 6 ang naputlan og kuyamoy sa ilang kamot sa Cebu City samtang 1 sa Negros Oriental.
Niabot og 16 ang napiksan sa mata ug 1 ang nakatuhon og watusi.
Ang 2 nga mga naigo sa saag nga bala gikan sa Mantuyong, Mandaue City ug Barangay Sudlon II sa Cebu City.
Si Rennan Cimafranca, regional epidemiologist, nipadayag ang pagpasagad sa mga tawo sa pagpabuto hinungdan nga napagan ang uban, ang nakaingon nga padayon nisaka ang gidaghanon sa mga nabuthan og pabuto.
Alang niya epektibo gihapon ang kampanya sa DOH batok sa pabuto nga gipaagi og sayaw
ni Health Secretary Eric Tayag.
“Pero duna man gihapoy dili maminaw unsay kadaut madangatan sa pagpabuto. Kung gusto sila mominos, mas maayo unta maminaw sila sa adbokasiya sa DOH,” padayag ni Cimafranca sa pakighinabi sa Sun.Star Superbalita kagahapon.
Hangtod nga adunay mamaligya og pabuto ug ang mga tawo padayong mopalit niini, aduna gihapoy mabuthan og pabuto, dugang pa niini.
Siya nibutyag nga nagplano ang DOH nga mo-lobby alang sa hingpit nga pag-ban sa pabuto sa tibuok nasod.
Samtang si Chief Supt. Danilo Constantino pangulo sa PRO-7, nibutyag nga ila na kang gitahasan ang iyang mga sakop sa pagsusi sa duha ka mga kaso sa stray bullet.
Ang mga biktima igo lang hinuong nangaigo sa paa.
Si Constantino niingon nga mokuha silag mga ebedensiya sama sa mga slug sa bala aron ilang mapadala ngadto sa Camp Crame alang sa ballistic exam.
Nibahad si Constantino nga kon ilang sakop ang nihimo niini, mag-atubang sila og kasong kriminal ug administratiba.
Sa wa pa ang Pasko, ang kapulisan lukop nasud nibutang og masking tape sa sumbohan sa armas sa kapulisan pagpakita nga seryoso sila sa ilang kampanya batok niadtong magpabuto og armas atol sa pagsugat sa Pasko ug Bag-ong Tuig.
Samtang wa nay upat ka mga kuyamoy ang kamot sa usa ka amahan nga nisugat sa Bag-ong Tuig human ang pabuto nga giduslitan niulbo sa iyang kamot niadtong alas 12:10 sa kaadlawon sa Enero 1, 2014, sa Barangay Aliwanay, Balamban, Sugbo.