IHAKOP sa kakugang ang pagsugat sa bag-ong tuig sa mga taga Daanbantayan human hikaplagi mga alas 6:30 sa buntag ang tulo ka mga lawas sa sulod sa usa ka banko sa lungsod.

Ang tulo ka mga lawas nga iya sa sikyu, kapuyo niini ug laing kawani sa Fairbank nga nahimutang sa Sityo Bliss, Brgy. Pajo, Daanbantayan, dunay samad pinusilan.

Sila Jennelyn Megabon, 26, dalaga, accounting clerk sa Fairbank, taga Barangay Dayhagon, Daanbantayan; Dean Deserto, 26, dunay kapuyo, security guard sa Fairbank, sakop sa Ricarte Security Agency, taga Baranga Agojo, ug kapuyo nga si Cecilia Torres, 30, taga Barangay Dakit, Barili, pulos patay nang nakaplagan sulod sa banko.

Ang suspek giilang si Berly Tudtud, 28, security sa Fairbank, dunay kapuyo, taga Barangay Dakit, dakbayan sa Bogo.

Si Tudtud wa na igkita sukad niadtong Bag-ong Tuig ug gipangita sa kapulisan.

Si PO3 Alfredo Mandal, imbestigador sa Daanbantayan Police nga nahinabi sa dySS Super Radyo ug Sun.Star Superbalita, nagkanayon nga ang mga biktima pulos nakaangkog samad pinusilan sa ulo gikan sa bala sa shotgun.

Matod niya nga usa nila ka saksi ilang gihuptan apan gitago lang una ang ngalan diha sa iyang payag nga nahimutang likod sa pader sa compound sa Fairbank.

Ang saksi niingon nga nakadungog siyag buto sa armas niadtong Desyembre 31, 2013, mga alas 11:45 sa kagabhion.

Sa wa pa ang buto-buto sulod sa compound sa Fairbank, usa ka siyagit sa babaye ang iyang nadu­ngog nga “Ayaw, Ber” ug nisunod dayon ang tulo ka sunodsunod nga mga sipang buto.

Wa sila manumbaling kay nagtuo nga buto-buto kini sa fireworks atol sa pagsugat sa Bag-ong Tuig.

Pagkabuntag sa Enero 1, nakugang sila sa ilang nakaplagan.

Si Mandal niingon nga ang mirelibong gwardiya nga si Bernardo Veraque, kinsa unang adlaw sa pag-duty isip relibo ni Tudtud, ang nakakaplag sa mga biktima.

“Gipangdul-itan gyud ni sila, Sir! Giunag pusil ang kaubang gwardiya, dayon gisunod, ang kapuyo ug ang clerk kinsa nag-overtime,” dugang ni Mandal.

Human sa pagpatay niya sa mga biktima, giguba ang steel cabinet diin didto ang cash nga P80,000 dayong sibat.

Ang branch manager nga si Julius Masabate maoy nipahibawo kalabot sa nahanaw nga cash.

Gipadayag niini nga tulis ang motibo sa kremin kay tataw nga giguba sa suspek ang steel cabinet.

Ilang nahibaw-an nga kutob ra sa Disyembre 31 ang suspek isip gwardiya tungod kay gi-

terminate sa ilang agency.

Sila si Tudtud ug Deserto dunay karaang panagbangi hinungdan nga gilakip kini nila sa imbestigasyon.

“Wala gyud ni siya kabantay kay naglingkod man siya. Ang armas niyang .38 nga may mga bala diha pa sa iyang possession, uban sa duha ka kabhang sa 12 gauge shot gun,” dugang ni Mandal.

Si Torres niapas kini kay didto na lang sab siya mag bag-ong tuig.