TAGUM CITY -- Mitala og walo ka mga kaso sa pagkaangol gumikan sa pabuto ang siyudad sa Tagum sa pagsugat sa Bag-ong Tuig.

Sumala sa Tagum City health office, kasagaran sa mga biktima mga bata ug menor de edad kinsa nasamad human nabuthan sa gidili nga pabuto nga piccolo.

Matod sa mga awtoridad, mas taas ang maong ihap kung itandi sa mga kaso nga natala sa miaging tuig.

Hinuon, sagad sa mga biktima nakahiagom lang og ginagmay nga samad.

Gumikan niini, subli nga nagpahimangno ang mga health officials nga gikinahanglan na gyud ang hingpit nga pag-ban sa mga rebentador aron nga wala nay madisgrasya.

Samtang sa pikas bahin, kon sa ubang lugar daghan-daghan ang nabiktima sa mga rebentador, mitala og zero casualty sa firecracker ang probinsiya sa Compostela Valley.

Sumala ni Dr. Renato Basañes, walay natala nga naangol sa mga rebentador ang Compostela Valley Provincial Hospital sukad niadtong Martes hangtod kagahapon.

Matud ni Basañes, wala pod nakadawat og pasyente nga nabiktima sa pabuto ang mga district hospital ug mga municipal health center sa kalungsoran sa probinsiya.

Tungod niini, nagpasalamat ang provincial health officer sa katawhan sa suporta sa ilang kampanya batok pabuto. (Teddy Cabana)