DUGAY-dugay na kong nakakanta og “Bayan Ko” uban sa pipila nga nakigbisog. Mao nga daw nabag-ohan ko kagahapon sa hapon dihang niapas ko sa general assembly sa Cebu Coalition Against the Pork Barrel System sa Filipiniana room sa Archbishop’s Palace.
Daw nagpalihi kami sa labing unang general assembly sa coalition karong 2014 diin usa sa labing bug-at nga desisyon mao ang paglihok aron mahiusa ang lain-laing mga anti-pork nga grupo sa nasud.
Gani, atong nasayran gikan kang Fr. Emy Maningo nga maoy ni-adto sa Manila nga halos uyon na ang tanan kabahin sa pagduso sa anti-corruption movement pinaagi people’s initiative.
PALMA
Yes, diha ang meeting sa palasyo, timailhan sa suporta ni Arsobispo sa Sugbo Jose Palma sa pakigbisog nga wagtangon ang kurapsyon gikan sa atong sistema sa kagamhanan.
Wa ko makapaminaw sa iyang mensahe apan gisultihan ko dihang naabot nga si Arsobispo Palma nipadayag sa iyang pagsuporta sa coalition. “I am with you all the way,” matod pa ni Palma.
Atong mapaabot nga si Arsobispo Palma modala og dakong papel niining direksyon nga mahiusa ang mga anti-corruption movements sa nasud.
Nakahibawo na man kita nga usa sa lisod mahiusa ang mga Pilipino lakip na ang mga lain-laing protest movements nato.
PDAF
Tinuod nga nidesisyon ang Korte Suprema nga wagtangon ang PDAF gikan sa budget sa Kongreso ug Senado. Apan kinahanglang tukion kining bag-o lang gipirmahan ni Presidente Noynoy Aquino nga 2014 budget nga niwagtang kintahay sa PDAF.
Usa man gud sa paagi sa pag-circumvent sa maong desisyon sa Korte Suprema mao man ang pagbalhin lang sa line item sa mga nahitungdang ahensiya sa kagamhanan apan ang magbabalaod gihapon ang nagtudlo.
Kinahanglang makat-on ang atong magbabalaod nga ang ilang trabaho mao ang pagpanday og balaod, dili ang pagmugna og mga proyekto.
Ila lang ang pag-approve sa national budget nga gisumitir sa executive department.
Apan lakip sa ilang trabaho mao ang oversight. Mao kini ang pagsiguro nga way binuang ang pagpakanaog sa mga proyekto sa kagamhanan.
COA
Dunay usa ka mahinungdanong tigum diay nga wala nako matambungi ug mao kini ang sesyon diin usa sa giimbitar mao ang representante sa Commission on Audit (COA).
Atong nasayran nga nasubo ang naminaw sa maong representante kay wa man diay klarong monitoring sa mga hinabang nga niagi sa kagamhanan human sa linog nga niini sa Sugbo ug Bohol sa imaging Oktubre 15 ug ang super typhoon nga si Yolanda sa imaging Nobiyembre 8, 2013.
Angayan gyud nga manginlabot ang publiko nga matarong sa pag-audit kining tanang mga hinabang. Nakahibawo na man kita nga daghan ang mga kurakot ug mosiaw kini kon way magbantay.
Ug ato ra bang nasayran nga mas dakong kantidad nga ibubo sa kagamhanan ug mga pribadong grupo alang sa gipahigayon karong rehabilitation ug rebuilding.
(politika2013.wordpress.com)