DAKO na gyud og kalahian ang Davao karon kon itandi sa mga katuigan nga milabay, kaniadto sa administrasiyon ni Mayor Luis Santos gikan sa tuig 1972, hangtud sa tuig 1980, mi-income lamang og P350 milyones sa pagpuli na ni Mayor Elias Baguio Lopez sa tuig 1981 hangtud sa tuig 1986, mi-income ang atong siyudad og P689 milyones, pagpuli ni officer incharge (OIC) Mayor Zafiro Respicio sa tuig 1986 hangtud sa tuig 1988, mi-income ang Davao og P753 milyones.

Mao kini ang income sa atong siyudad sa Davao pag-assume ni Mayor Rodrigo Duterte niadtong Pebrero 1, 1988. Gikan niining maong tuig, nag-anam ug nag-anam og saka ang income sa atong Dakbayan sa Davao, hangtud sa tuig 1992 kon diin unang natukod ang Victoria Plaza mall.

Gikan niadto midagsa ang mga local investors dinhi sa atong siyudad, gumikan priority ni Mayor Rody Duterte ang peace and order, naikag sila sa pagbutang og mga negusyo tungod kay secure sila dinhi sa nag-unang dakbayan sa Mindanao nga mao ang Davao City.

Karon aduna nay unom ka mga dagkong mall ang atong dakbayan sa Davao, ug mga dagkong hotel nga dili nato ikaulaw bisan pa kon mag host kita og mga International events.

Gikan sa P753 milyones, ug sulod na karon sa 25 ka tuig, ang income sa Davao City miabot na ngadto sa P5.1 bilyon sigun sa gi-aprobahan sa 17th City Council niadtong milabay nga tuig 2013. Ug matud pa ni finance committee chair Councilor Danny Dayanghirang, hayan moabot pa ngadto sa P6 bilyones ang kita sa siyudad kay nagkadako ang atong bahin sa Internal Revenue Allotment (IRA) niining tuig 2014.

Mao na kini ang Davao City sa tuig 2014, dili na kita milyonaryo kon dili bilyonaryo na. Siyempre ang unang kredito ngadto sa adminitrasyong Duterte, ug sa mga negusyante nga buotan nga nagbayad sa ilang numero unong obligasiyon nga mao ang pagbayad og buhis.

Dungan unta sa paglambo sa atong income, ato untang makita ang dugang kalamboan sa atong palibot, sama sa dilapidated nga city engineer's office building nga kahugmakon na, ug pag-repair sa atong city street nga hilabihan ka lubak-lubak, ug sa atong mga drainage system nga kon ulanon kita’g 15 minutos maglunop na ang atong dakbayan Davao. Sulod na karon sa 19 ka tuig nga Sangguniang Panlungsod ang daku-dako nga project nga atong nakita sa siyudad. Duna unta to'y Sports Dome, pero wala man kapahimusli gumikan sa kainit sa politika sa atong siyudad.

Sa sunod tuig, mag-anam pa gyud kadako ang atong income, siguro naman after peace and order, development napud ang atong gustong makita sa atong pinangga nga dakbayan sa Davao.

Alang sa inyong dugang komento, pag-email lang sa algenoguin@yahoo.com o superbalitadavao@yahoo.com.