UNOM ka mga balay ang daling gilamoy sa kalayo alas 11:50 sa buntag kagahapon, Dominggo, didto sa Manggahan, Barangay Toril Proper, ning siyudad.

Sa inisyal nga impormasyon nga nakalap sa Superbalita, nagsugod ang sunog sa ikaduhang andana sa balay sa Languido compound.

Daling mikatay ang kalayo sa tapad nga mga balay sa compound.

Si Terisita Languido usa sa mga nasunugan nagsulti nga iyang nakita nga kalit miaso ang kisame sa balay sa ikaduhang andana.

Sanglit gama sa kahoy ang mga balay, gilamoy dayon sa kalayo ang unom ka balay, laing tulo ka mga balay nga partially damaged.

Daling miabot ang kabomberohan hinungdan nga napalong dayon ang kalayo sa dapit.

Ang Bureau of Fire Protection (BFP) wa pa mipagawas sa kantidad sa danyos ug hinungdan sa pag-ulbo sa kalayo.

Hinuon, walay natalang nakabsan sa kinabuhi sa maong hitabo gawas lamang sa usa ka lalaki kinsa dunay dakong samad sa tiil atol sa hitabo.

Daling giatiman sa City Social Services and Development Office (CSSDO) ang pito ka mga pamilya nga naapektuhan sa sunog.

Sa monitoring sa Superbalita, unom na ka sunog ang natala sa adlaw nga Sabado ug Dominggo. (Jeepy P. Compio)