SI Davao City Mayor Rodrigo Duterte kagahapon nagsulti sa mga drayber nga madakpan sa overspeeding nga mopailawom sa drug ug sobriety tests ug mabilanggo, kon masuta nga positibo sila.

"If you smell of alcohol, or ang pulis nag suspetsa naka-druga ka, you will not be released. You will be asked to park properly sa highway and the police will take care of that (vehicle) for you. Dad-on ka sa hospital, sobriety test or a drug test," sulti ni Duterte sa iyang Gikan sa Masa, Para sa Masa nga programa sa telebisyon kagahapon sa buntag.

"Kung hubog, isulod sa prisohan. Gusto nako isulod gyud sa selda. Kamong mga police, ug inyong dakpon nga makit-an nako na sila sa gawas, hasta ikaw isulod ta mo sa prisohan og dungan," dugang sa mayor.

Usa ka video ang gipakita kagahapon nga dunay daghang aksidente sa kadalahan tungod sa kusog nga dagan sa sakyanan.

Nakita sab nga kasagaran sa aksidente gikalambigitan sa mga nagsakay og motorsiklo.

"Sila, kadaghanan kay sila man pud ang daling mamatay. Kadtong dili motuman sa balaod, malipay ko nga mamatay mo," sulti ni Duterte.

Si Duterte nagsulti nga ang City Government of Davao motabang sa paghatag og hustisya sa mga biktima sa kusog magpadagan nga mga drayber.

"The city government will fund your case para gukdon ni. Kasuhan ta gyud mo," suma sa mayor.

"I want you inside kay maayo ang environment diha sa prisohan. Limpyo kaayo na. Mga ilaga diha dagko kaayo na, morag kabaw kadako. Hala! Dumoga na," pahayag ni Duterte. (Arianne Caryl N. Casas)