BARO a tawenen. Ket nia koma? Nia koma’t sirbi ti panaglupos ti tawen no dagiti met la DAAN a pasamak ti agtultuloy nga intay gamuluen? Kas koma isyu ti PDAF. Nalpas kadin? Adayo pay a malpas. A ti kayatna a sawen…ita a tawen, 2014….asgkakababtuog manen ti nagan a NAPOLES ti intay mabasa, mabuya ken mangeg iti sosyodad. So, kasla saan a naglupos ni 2013. Natural agsipud ta siglo ti palpasentayo sakbay nga adda bungana dagiti agtutuon nga imbestigasyon kadagiti agtutuon a kakurakutan ditoy pagilian. Ditay pay nakapangrugi. Pasig nga akusasyon pay laeng ken panagipila kano kadagiti kaso. Naulimek pay laeng iti benneg dagiti akusado. Ket no magnanton ti legal a proseso, kas tay nakunamin……agkurang ti pagbaludantayo para kadagiti nakadarum. Mariakusina….amangan ta addanto ketdi dagiti balud nga adda kadagiti EVACUATION CENTERS . Arasaas: agaramiddan a iti CONCENTRATION CAMP kas idi panawen ti gubat! Masapuldanto ngata iti RELIEF?

Hoy, talnaka man!

**********

Iti kallabes a baro a tawen…saan a nabaw-ing ti pangeddeng ni Mayor Mauricio Domogan kasta met ken ni La Trinidad Mayor Edna Tabanda panggep iti panangkontrada iti panaglako kadagiti paputok ken pailaw. Ngem nakalusot ti Tuba. Ngem saanna a kayat a sawen a dita ti nakagatangan dagiti napaputok ken nangraniag iti tangatang ditoy lokaledad. Natural nga adda dagiti naggatang kadagiti paglakuan ti paputok iti ruar. Iti report…nakurang a tallupulo ti nasugatan iti sibubukel a Kordilyera. Kayatna a sawen nga uray kasano ti mangipawil iti paputok…adu latta met dagiti sumari. Ditay ammo kadagiti masungad a panawen no kasano ti pagtungpalan ti isyu ti Firecrackers Ban. Ngamin, nainget ti singasing ti DOH a fireworks display laengen koma imbes a panagaramat kadagiti firecrackers. Umayon ditoy ti Malakanyang ket inna pay ketdin tinapik dagiti LGU ken Kongreso a sapay koma ta maipasan ti Firecrackers Ban ditoy pagilian. Abangan ang susunod na kabanata.

Pahabol: adu ngamin dagiti mahilig MAGPAPUTOK isu nga ti tapik: tapno adayo it disgrasya iti PANAGPAPUTOK….agaramat iti CONDOM! Hooyyyy! Sumablay ka na naman!

**********

Three Kings ita. Masiguromi a no kasano’t kapuskol dagiti tao kadagiti parke nangruna iti Burnham Park idi Paskua ken Baro a Tawen…kasta met laeng ita a gundaway. Ngamin daytoyen ti kaudian nga aldaw ti Christmas Holidays. Adu pay dagiti turista ti nabati ditoy lokaledad tapno inda riknaen ti lamiis ken saguday ti pul-oy Siberia nga awan kadagiti dadduma a rehiyon. Ditoyda laeng Kordillera a maimatangan ti Andap wenno nagbalay a yelo kadagiti mula gaput kinalamiis ti panawen. Adda pay dagiti bisita ti nagnaed kadagiti impatakderda a tents kadagiti parke idinto ta nakaron ti lamiisna. Kayatda kano a riknaen dayta a lamiis ta didanton marikna inton agsublidan kadagiti probinsiyada. Kadagiti nagtalek iti indiaya a linglingay ken serbisyo ti siyudad, probinsiya ken rehiyon…..yabrasami ti nabara a panagyamanmi kadakayo. Siuray ti abrasami iti inkayto manen panagsubli nangruna ket umadanin ti panangrugi ti Panagbenga 2014.

**********

Bulanen ti limmabas ngem ita pay laeng a naitanem ti nasurok ribu a bangkay iti deppaarna ti Tacloban. Inyur-urayda kano kadagiti mangbigbig a kabagyanda. Kasano kano nga adda mangbigbig no aminda nga agpapamilya ket pimmusay gapu ken ni Yolanda? Wen aya. Ala ket sapay koma ta masarakandanto pay dagiti adu pay a missing agpapan ita.

Nasuroken iti ennem a ribu dagiti pimmusay a ti kayatna a sawen…nasurok iti ennem a ribu ti naglulua a simmarabo iti Paskua ken Baro a Tawen itay nabiit. No kasanoda a pinalpas ti panaglupos ti tawen iti likud ti kalamedad a nangimameg kadakuada….isuda laengen ti makaibaga. No datayo a di sinaplit ni Yolanda ket makariknatayo iti saem…nakarkaron kadakuada. Sapay koma ta iti kabiitan a panawen, maited met laengen kadakuada ti talingenngen ken kired a bumangon ken mangabaruanan. Kas met ti intay ibabangon manipud panangsudek ti ginggined kadatayo idi 1990. Happy Three Kings appomi.

**********

Adu’t nakadlaw nga idi leleg ti Chrismas Season…adu kano kadagiti pulitikos ti narigat a suroten ti tuggotda. Hmmm..amangan ta adu dagiti imbitasyon a napananda. Wenno agsisipul dagiti programa nga isuda dagiti kangrunaan a bisita. Tradisyon daytan, apo. Natural a tay alaem a kangrunaan a bisitam ay ket tay makaited iti pagragsakan ken pagkrismasan dagiti agpasken, saan aya? Diak ammo no kasanotayo a pugsaten ti sintas daytoy a kannawidan. Kunada ngarud, naimot kano ni grasya no dika tumalliaw kadagiti agkasapulan. Tsk Tsk! Piman met dagiti nakiddit ti puonanna. Makarusan. Isu ngata nga adda dagiti agpukaw nga opisyal iti kastoy a panawen? Ahm, diak masungbatan dayta apo. Ngem adu met nga opisyales ti saan a naglangan iti opisinada uray pay ginabsuon dagiti SOLICITATIONS. Tay sangakabassit a maidiayada a pagragsakan….makaanayen nga agas ti bannogda. Kudos kadakayo a nakarikna. Ket kadagiti di nakarikna? No comment kami. He he!

**********

Adu’t nagkuna a napintas ti pakabuklan ti Rose Garden saan laeng a gapu kadagiti fountains no di ketdi ti naraniag a Christmas Village. Ita laeng a tawen a naaramid dita a disso. Agaatipil dagiti nagpapaletrato a bisita. Adda pay nangegmi a nagkuna a mayat kano no didan ikkaten dagita a dekorasyon agingga’t Panagbenga. Maikkat laeng dagiti Christmas motiff dita, mayaten kunada. Ti pannakaammomi…ikonkonsidera ti opisina ti turismo ken lokal nga ehekutibo ti nakuna a singasing. Ngem adda laeng nadlawda iti maysa kadagiti fountains dita rose garden.

Kasla napasman sa metten wenno agsakit ti SARSARIPIT a kunada. Dandani ngamin kano di AGPUGSITEN. Makabang-ar kano no MAYAT TI PUGSITNA. Pakikitayo man kano, please. Sabagay, amin a MAEPPELAN…MADI! IPUGSITMO!

**********

Ngimmato manen ti presyo dagiti petroleum products. Banag a mangitonda kano iti kilos-protesta iti daytoy a lawasna no di masebseban ti gandat ti adu a grupo. Adda kano pay gumiddan a protesta dagiti dismayado iti serbisyo ti Aquino Administration. Dayta ket ti banglesna ta amin a riper kada rugit ken siit iti kagimongan ket ibatoda aminen ken ni Pres. Noynoy. No koma ta agpapanunottayo met iti pamkuatan a tumulong iti gobyernotayo a mangresolba kadagitoy a parikut ti kagimongan…saan ngata a mas naim-imbag ngem tay tabbaawantayo ti biddut nga aramid a dika met tumulong a mangsolbar? Awan dumana daytoy iti ugalitayo a bugtabugtakentayo tay manok a kutak a kutak ta makait-itlog ngarud.

Ditay kayat ti makaringgor a kutakna. Ngem inton nakaitlog, pagiinnagawantayo met nga iluto a pamedped ti inyetlogna. Arasaas: siguro agulimek ti aglawlaw no MANGASAWAN ni P-Noy. Hmm…MAKAITLOG met ngatan? Depende a no ammona ti AGKUTAK! He he..joke lang. Happy Three Kings manen, kailian. Adios mi amor, ciao, mabalos!