NAKAHILAK si Danny Ildefonso human niya natabangan ang Meralco Bolts sa overtime nga kadaugan niini batok sa Air 21 Express, 92-88, sa Philippine Basketball Association (PBA) Philippine Cup sa SM Mall of Asia Arena sa Manila.
Emusyonal ang kanhi 2-time MVP gumikan kay mao kini ang labing una niyang duwa isip sakop sa Bolts. Taodtaod sab siyang naghuwat isip free agent human siya gibuhian sa Petron Blaze Boosters.
Si Ildefonso, kinsa kanunay lang naglingkod dihang sakop pa kini sa Petron, nipakita nga aduna pa siya’y saktong ikabuga ug niamot siya’g 14 puntos alang sa kadaugan.
Ang Bolts, nga nakabangon gikan sa upat ka sunodsunod nga kapildihan, gipangulohan ni Gary David pinaagi sa iyang 34 puntos.
Epektibo kaayo ang presensya ni Ildefonso sa ilawom ug alang kaniya, gitubag sa Kahitas-an ang iyang pag-ampo.
“Answered prayer, dahil habang naglalaro, nagdadasal ako,” asoy ni Ildefonso sa interbyu sa www.spin.ph. Si Ildefonso sulod sab sa 15 ka mga tuig nga nagduwa sa San Miguel Beer/Petron Blaze franchise una nabalhin sa Bolts.
Gipasabot ni Ildefonso nga nakahilak siya gumikan kay mismo siya nasurpresa sa iyang gipakitang duwa.
“Kasi sinurprise ako ni God eh. Hindi ko in-expect na ganun yung lalaruin ko. Sabi ko sa Kanya, yung mga bagay na hindi ko kayang gawin Siya na yung bahala eh.”
“Talagang God is good talaga. Yung ginawa Niya sa akin, talagang hindi ko expected, tsaka yung ganung playing time. Kaya naiyak talaga ako.”