SA Pebrero na mabatyagan sa mga konsumidor ang pagwagtang sa Metropolitan Cebu Water District (MCWD) sa singko porsiyento nga diskwento.
Si Rowan Teñedo, corporate planning department manager sa MCWD, nibutyag nga sa sunod buwan makita sa bill sa tubig ang kausaban sa bayranan sa mga konsumidor.
Atol sa tulumanong “Dialogue on the Air” ni Lloyd Suarez sa sibyaanang dySS Super Radyo Cebu niadtong Sabado, si Teñedo nipasabot nga bisag giwagtang ang singko porsiyento nga diskwento, padayon nga gi-subsidize sa water district ang presyo sa tubig alang sa mga konsumidor.
“Heavily subsidize gihapon sila. Akong isulti para sa amo, ang MCWD wa mi nag-oppress nila kay subsidize gihapon, mao ra gihapon ang presyo sa tubig,” pagpasabot niya.
Apan, dunay naghinangat nga pagsaka sa presyo sa tubig ang MCWD kon maaprobahan sa Local Water Utilities Administration (LWUA) ang nag-ungong nga petisyon niini nga nangayog 12 porsiyento nga diskwento.
Wala pa hibaw-i kanus-a mapatuman ang usbaw.
Matod ni Teñedo niadto pang 2006 katapusang nipaumento ang MCWD sa bayranan sa tubig.
Ang usbaw ipatuman tungod sa contingent sa bulk water supply nga 35,000 cubic meters ilabi pa karong Hulyo, surface water na ang gamiton sa MCWD nga mas mahal kon itandi sa underground water diin gikan ang labing dako nga tinubdan sa tubig niini sa pagkakaron.
Sa print ad sa MCWD sa Sun.Star Cebu niadtong Disyembre 29, 2013, kini nipahibawo nga ang diskwento mo-apply lamang niadtong mobayad sa di pa o sa mismong adlaw sa due date, ingon man kon ang makonsumo nga tubig mosobra sa 50 cubic meters matag buwan.
Way diskwento nga ipatuman sa power cost adjustment, purchased water adjustment ug franchise tax.
Si Teñedo nidugang nga wa na sila mokonsulta sa publiko sa pagwagtang sa diskwento tungod kay perogative na kini sa MCWD, ingon man sa LWUA, sanglit ang water increase ang giatiman niini.
Sa ikatulong semana ning buwana, ipahibawo nila sa nagkadaiyang mga local government unit ug ubang stakeholders ang mga plano ug programa nga buot ipatuman sa MCWD isip pagpalambo sa serbisyo ngadto sa mga konsumedor.
Matag adlaw, moabot og 170,000-180,000 cubic meters ang average consumption nga tubig sa mga konsumedor, diin P13.60/cubic meter ang kantidad alang sa unang 10 cubic meter consumption.