DAGHAN ang nanagna nga malambuon ang tuig 2014 ilabi na sa mga dunay puhunan sa negosyo. Apan wala gihapon ta makalikay sa mga pangagpas nga ang mga kalamidad nga atong nasinati sa niaging tuig posibling mahiagoman gihapon nato ning tuiga.
Ako kutob ra gyud sa pagbasa o pagpaminaw ining mga pamahayag sa mga experto ining
pagbasa sa kapalaran sa atong nasod, apan kon kalamidad ako gyud na nga seryusohon.
May panagna man o wala ang linog ug bagyo di gyud na nimo kakompiyansahan.
Niadtong pagbukas diay sa tuig 2013, duna bay itagna nga mahiagom ang Bohol ug Sugbo sa makalilisang nga linog? Duna pay nitagna nga mahiagom ang Tacloban ug ubang lugar sa Kabisay-an og grabe kamangtas nga bagyo? Pun-an pa sa storm surge kong pagdako sa dagat nga nipatay og daghang kinabuhi. Wala pa ni labot sa mga trahedya sama sa sunog, disgrasya sa kadalanan ug bisan unsa nalang ang atong pasanginlan mao ang kadanghag sa mga tawo. Kwentahon lang gud nimo ang gidaghanon sa mga balay dinhi sa Sugbo nga naugdaw sa sunog, matanditandi sab nimo sa gidaghanon sa duha o tulo ka barangay sa Tacloban nga nahapay sa bagyo.
Ang mga kinabuhi nga nakalas sa mga disgrasya sa kadalanan dinhi sa ato ika tandi sab sa gidaghanon sa mga nangamatay sa linog sa Bohol. Mao ni ang tinuod ug klaro nga
kamatuoran, ang matag bag-ong tuig nga atong sugaton gihulga gyud og katalagman.
Mahimong iya sa kinaiyahan o hinimo ra sab sa tawo.
SUNOG
Usa sa katalagman nga angayan nga seryusohon sa matag molupyo mao ang sunog. Bisan kon magpalit pa ka og luto daan sa inadlaw nimo nga pagkaon. Sa ato pa, bisan gamay way magsiga nga kayo sa imong lung-aganan sa kusina dili ni garantiya nga di masunog ang imong balay. Mahimong sa imong kisame magsugod ang kayo kay niinit ang wiring sa kuryente. O, mahimong nag-amping ka, apan nagdanghag sab ang imong silingan. Parehas ra gud kon mag-drive ka og sakyanan. Munamuna nimong amping nga di makabangga o makasaghid, ikaw man sab ang mabanggaan kay wala man mag-amping ang ubang drayber.
Parehas ra na sa mga alarma sa sunog nga gitubag sa mga bombero. Kasagaran sa resulta sa imbestigasyon pagpabaya sa mga lumolupyo.