BISAN pa’g kapila gakagot ang ngipon, kinaham gihapon ang kangutngot. Pastilan, wa’y pagkatagbaw sa pagtilaw og tagam!
Makat-onan na unta ang hingpit nga paglikay sa mga hinungdan sa pagping-it. Sama, pananglit, sa nahiagom sa dugoon nga pagpatuyang og pabuto atol sa pagsaulog bag-ohay lang. Kon itandi sa niaging tuig, labihan kuno ang pagtuyhakaw sa mga “firecracker-related injuries in Central Visayas” dihang gahudyaka sa Pasko ug Bag-ong Tuig. Matod pa sa gadumala sa Department of Health (DOH) 7, “some people still could not observe safety precautions.” Ay, lingaw ug lisod gyod biyaan sa kadaghanan ang danghag nga binuhatan. Ulahi tuod kanunay ang pagbasol, ug dayag nga gapasulabi ang wala maghunahuna kon unsa’y dangatan sa pagkayam-angan.
Matiurok gyod sa pagkahay-ad ang gahi’g ulo nga humok maglabad. Ug sama sa bato nga gipantok sa kanhi hubon duyog sa lagubo sa mga pabuto, bug-at gihapon ang mga balik-balik nga katalagman nga gapasamot sa naandan nga mga katilingbanong suliran. Igo na intawon! Kini mao’y sagad gimulo sa atong kaigsoonan nga pinangga kaayong gipatuwad ug gipakamang sa gabinagis nga kinaiyahan. Ay, pag-antos nga kasagaran makapungkol sa wa’y puas nga pagpanguros taman sa pagtuo nga basin ang kaluwasan mahidangat ra nunot sa paghangad-hangad sa Kahitas-an.
Langitnon ra ba kuno ang pagtuo. Bahala na’g galukdo ta’g dag-om sukad gibundakan ta’g makalisang nga linog ug lunop, padayon lang gyod kuno tang magtingsi ug maglaom. Angay lang gyod gihapon tang magpasalamat sa atong padayon nga pagginhawa bisan nalibat na ta sa kakurat.
Kay matod pa sa giwali ni Archbishop Jose Palma bag-ohay lang, “It is true that life is short, but it is gift that we should thank God for.” Ug kay ang 2014 gitawag man nga “Year of the Laity,” giaghat pod tang mga Katoliko nga magpadayon sa paningkamot nga mahimong “saints and heroes in their own little way” kun magpakasantos ug magpakabayani sa atong ginagmay nga paagi.
Pahugti pa ang bakos. Bahala’g gatikuko na, hala, palahosa gihapon sa unahan ang igmat nga tinutokan. Sama sa gipangandoy ni Cebu Gov. Hilario Davide III nga mahimo untang maluloy-on ang 2014. Ning atong nasod nga gibinhod na sa gapungasi nga kulata—binuhatan sa kinagwang nga tawhanon ug bunga sa kinaiyahan—nanghinaot si Davide nga mahimatngon na ang mga tinugyanan gikan sa kabaranggayan hangtod sa kinatas-an nga kagamhanan. Unahon na gyod unta ang tulomanon nga “disaster preparedness.”
Magtul-id pagbarog, dili maghaguka. Kon kini tinud-on pinaagi sa kusganon nga pagpangandam dili na unya malimod nga napul-an na ta sa pinaumod nga pagtilap sa tagam. (geemyko@gmail.com)