ANG Department of Health (DOH) sa Davao nakatala na og katorse ka mga kaso sa tipdas sa pagtapos sa tuig 2013.
Ang datus gipaguwa ni Dr. Cleo Fe S. Tabada, Medical Specialist II sa DOH 11.
Sa maong ihap, napulo ang nagpositibo gikan sa Davao City, tulo sa Compostela Valley Province ug usa sa Davao del Norte.
Nasayran nga ang Buhangin District dunay usa, Bunawan - 1, Calinan - 1, District Poblacion B - 1, District Poblacion C - 1, District Poblacion D - 2, Sasa - 2 ug Talomo South - 1.
Ang maong datus base lamang sa surveillance data report gikan sa 10 ka National Sentinel Sites sa Davao Region.
Tungod niini, padayon ang kampanya sa DOH ngadto sa mga ginikanan nga dalhon na sa mga health centers ang ilang mga anak para sa libreng bakuna kontra measles o tipdas.
Gipamugos ni National Epidemiology Center head Dr. Enrique Tayag nga wa nagkulang ang gobyerno sa pagpanghatag og libreng bakuna para sa maong sakit taliwala sa pagsaka sa 300 ka porsyento sa kaso sa nasud gikan niadtong Nobyembre sa milabay nga tuig.
Una nang gideklara sa DOH ang measles outbreaks sa lima ka lungsod sa Metro Manila taliwala sa padayong pagsaka sa natakbuyan sa viral disease.
Bisan kadaghanan natakdan sa sakit ang mga bata, gipahayag ni Tayag nga bisan ang mga may edad o tiguwang mahimong matakdan sa maong balatian.
Kabahin sa mga sintomas sa tipdas ang pagpamula sa mata, ubo, sipon, hilanat nga moabot og 40 degrees Celsius ug ang paglipagha sa dalunggan, nawong, liog ug tibuok lawas. (AD)