DAVAO DEL NORTE -- Patay na ang kanhi gobernador sa probinsiya human nga giatake sa kasingkasing pasado alas 8 sa buntag kagahapon didto sa iyang balay sa Barangay Apokon, siyudad sa Tagum.

Sumala sa apo sa gobernador, kinsa nahinabi sa Superbalita kagahapon, kalit lang kaayo ang hitabo sa iyang lolo nga si Gelacio "Yayong" Gemintiza, kinsa nagpangedaron na og 81.

Gisulayan pa unta siya og dala sa Davao Mission Hospital apan nakabsan gihapon siya sa kinabuhi.

Sa pagkamatay ni Yayong, usa sa suod niyang higala nga si Cifriano Ramos, 86, taga Poblacion, Tagum ang naguol ug mitulo ang luha dihang nabalitaan nga patay na ang kanhi gobernador.

Nasayran nga suod na silang higala ni Yayong sukad pa sa ilang pagkabatan-on nga nahimong jambolero sa merkado publiko.

Daling miadto si Ramos sa morgue aron malantaw ang patay'ng lawas sa iyang higala.

Kahinumdoman, si Yayong nahimong mayor sa siyudad sa Tagum ug nahimong bise gobernador sa probinsiya, unya nahimong gobernador niadtong 2004-2007.

Sa dihang nagpasubli sa pagpapili, napukan siya ni Governor Rodolfo del Rosario.

Niadtong Mayo 2013 nga local election, si Yayong nagpapili unta sa pagka-kongresista sa unang distrito sa probinsiya. Apan sa wala pa ang gitakda nga piliay, misibog siya sa iyang kandidatura batok sa midaug nga si Congressman Anthony G. del Rosario. (Teddy Cabana)