MAPTENG ja bado’n tawen son sikatajo’ n emin!

Shiya kaptangan mowan i kawad-an niman ja tawen. Kaptangan ja Manida shiya sentro ni Makati, aliwen enges ni edapoan. Nakatangkaka i shontog shiya’y nem hajay ira hota kowan sha’n skyscrapers, shoshontog ja siminto’n etawaan bengat. Embanaw i pa-dok ja kakawata ni taytay ja embanenaw ngo. Nem maet mango etoling i shanum to. Haja mabidang bengat ja kadasan ja nandikmot shiya simisiminton opisina tan baley, kakaasin ag maskitan noman. No madebi, ayshi talaw shi dangit tep mashel i ketap ni asok shiyay ja kowan mo no kolpot. Singa dinmanespag i talaw shiya siminto ira’n opisina ja emenisili i silo sha.

Waraak mowan shiyay tep man-ashal mowan ni saki’n tawen. Wara’y scholarship ja in-akan niya Zuellig Center shiya Asian Institute of Management para ni Master in Development Management. Jet saki kitajo ja naaknan niya’y ja konshaway. Enemma polo kami’n emin. Api-apil ja nasjon tan dogad i edapoan niya kaiskuydaan ko. Nakamansademat son Apo Shiyos niya blessing ja in-akan to niman ja bado’n tawen.

Sango niya iskuydaan i Greenbelt Mall shiya sentro ni Makati. Shiya’y mala i penga-penganan. Pineshas kon mengan shiya’y ni inkaykesheng ko ni enrolment. Maenosan mowan ja sasakin mengan. No tiyempo ni sekep ma no Dones ita ali ira’y mekajem ja kaiskuydaan.

Nonta wara ak shi panganan, singa wara ngo’y three Kings ja inaspol ko. Hota epangdo, engan ngodma kad-an ko. Nonta binmingi, inimatonan ko. Kait to hota kakajem to. Tinaway ko jet inaskang sha ak. Sikato hota anak ni maistara’k shi SLU Baguio nonta kolehiyo ak. Stewardess sikato niman jet eman inakad shi Baguio no wara’y waya to. Sespian to ngo’s nanang to.

Nonta inon-an kos iyay wara’y dinmabas ja am-amtak mowan. Doktor ja consultant ma niman shi Philippine General Hospital. Binidbid towak nonta dinmabas shima panganan. Kait to ngo’s asoga to. Say naonod ja nan-aspolan mi 10 tawen mala i edabas. Kait ko pay sikato shi Itogon nonta nan-community immersion kamid man nonta iskuyda kami pay lang shi UP College of Medicine. Nan-kumustaan kami jet dinmajat ngo ira nen asoga to.

Eka-ekay dimawak shi pharmacy ja menongkal ni agas. Wara mowan i inaskang kon kowan ko i singa am-amtak ja bii. Sikato nga agpayso. Kajem ko iyay ja nonta 2005 emo i kaonoran ja inon-anan ko son sikato. Inam-amtak sikato shi Ten Outstanding Students of the Philippines ja programa- saki iyay ja youth program. Sasaki to ayshi kakajem ono asogan kait to nonta emenongkal. Nem kowanto i, “Komosta ka mala! Ngantoy wara kad shiyay? Ontayabak no daem, nokabasan ja ondaw shi Switzerland. Swiss i kakajem ko jet mankasal kamid man. Shiman ak mala for good.” Naykasat ja inaspol kodman say i-best wishes tan congratulations ko ngo.

Saki’n oras bengat shiya Manida’n milyon i totoo, wara’y naaspol ja tedo’n am-amtak. Hajay i kowan sha’n ootik i dobong (it’s a small world). Singa three Kings ira para son sikak niman ja Feast of the Three Kings ngo. Hajay ya tedo’n kajem ja naaspol ko singa shaka i-represent ngo i tedo’n nay-esop shi poso tan deknak angken niman ja Manida nin i pan-yanan ko: Baguio, ono Kordilyera ja edapoan tan kad-an ni pamilja; health ono medical field ja sikato’y naypetekan ni obda tan pantolong; tan youth programs tan youth ja sikato’y ag madibkanan ja kait no pangkep ni panprogreso ni nasjon tayo.

Hama tedo’n inaspol ko, wara emin i kakajem ono asoga ono asogaen sha. Singa waray shaka pan-ikowan ngo a. Son sika’k emo ngo, haja iskuyda niman ja tawen i badon asogak ono kakajem ko. Sesmeken ko koma ngo say peteng i dawan.

Kowan nen Apo Pari shi homily to i “Ag mesepol ja mambedin ka ni talaw, mayat no makibingay ka ni silo ni talaw nen Apo Shiyos. Hama silo to i manpasilo son sikam.”

Niman ja badon tawen, memodod kitajo ni silo nen Apo Shiyos. Para son sikak piyan kon onsilo ja manbedin ni angdil para soni Kordilyera, salon-at ono diteng, tan youth programs. Para son Apo Shiyos. All for His glory.