AGI og pagpangandam sa Sinulog 2014, dugang security plan ang giandam sa kapulisan sa Metro Cebu aron pagsiguro sa kaluwasan sa mga motan-aw sa grand parade.

Si Sr. Supt. Rey Lyndon Lawas, hepe sa  Lapu-Lapu City Police Office, niingon nga nagpagawas og command memorandum circular ang Police Regional Office-7 nga nagmando sa paghatag og ayuda  sa dakbayan sa Sugbo atol sa Sinulog.

Matod ni Lawas nga gawas sa 100 ka mga police personnel nga ilang idugang sa siyudad sa Sugbo, ila ipadala usab nga ipadala ang ilang K-9 dogs.

Siya nibutyag nga ka­bahin sa ilang security plan mao ang pagpakatap sa ilang tourist police sa nagkalain-laing hotels ug resorts sa posibilidad nga daghang VIP’s ang posibleng mopuyo sa Lapu-Lapu tungod kay di paigo sa siyudad sa Sugbo.

Gilauman nila nga karong Huwebes ug Biyernes modagsa na ang mga turista, lokal ug mga langyaw hinungdan may mga police personnel usab silang gibutang sa airport.

Samtang pahugtan sa Sinulog Foundation ang seguridad sa ilang buhatan aron di na masubli pa ang nahitabo niadtong Sinulog 2012 nga nakawatan og minilyon ka pesos ang ilang buhatan.