MAS gipahugtan karon ang seguridad sa tanang mga hotel, motel ug uban pang hospitality establishments sa dakbayan sa Lapu-Lapu nunot sa pagpahigayon sa Ironman event karon.
Sud sa duha ka adlaw, katulo gitigom sa Lapu-Lapu City Police Office - City Intelligence Branch (LLCPO-CIB) ang mga hospitality establishment sa dakbayan aron hisgotan ang seguridad.
Matod ni Superintendent Mark Gifter Sucalit sa CIB nga atol sa ilang tigom kagahapon tali sa mga security personnel ug manager sa hotels, inns, ug lodging houses nga iyang gihimug-atan nga mas maayong kahibawo ug adunay kaalam sa pagsumpo sa mga dautang elemento ang ilang mga security personnel.
Sa ilang meeting sa LLCPO headquarters kagahapon sa buntag, gimanduan ni Sucalit ang mga representante sa tanang establisemento nga mas istriktuhon ang pagpasud sa mga bisita gawas sa mga mo-check-in.
Niadtong Biyernes sa hapon, ang Lapu-Lapu City Association of Hotels & Resorts Security Officers (LCAHRSO) gitagbo ni Sucalit tungod sa mga pagpangandam.
Gihisgutan sa meeting nga gitambungan sa 14 ka miyembro sa LCHARSO, pinanguluhan ni Edwin Clavano, mao ang profiling sa mga langyaw, mga nakat-unan sa nanglabay nga insidente, ug monitoring sa kadudahang mga tawo o grupo ug uban pa. JPP