MOKABAT sa P482,400 nga kantidad sa toloy ang nasakmit sa joint operation sa mga sakop sa Cebu Provincial Anti-Illegal Fishing Task Force ug San Remigio Bantay Dagat gikan sa duha ka managlahi nga fishing boat nga nanagat taliwa sa Barangay Bangkasan ug Barangay Anapog sa lungsod sa San Remigio niadtong Dominggo sa sayong kaadlawon.

Si Provincial chief security officer Loy Madrigal, team leader sa operasyon, nibutyag nga gidakop ang RAV-1 ug RBS-1 human sila nasakpan nga nanagat sud sa municipal seawater sa San Remigio.

Matod niya ang pagpanagat sud sa 15 kilometros sa municipal water ang hugot nga gidili sa provincial ordinance.

Ala 1:30 sa kaadlawon, una nilang nasigpatan ang RAV-1 nga nanagat sa nahisgutang dapit gamit ang active gear ug Sonar.

Si Madrigal nagkanayon pinaagi sa Sonar makita ang gidaghanon sa mga isda ug illegal ang paggamit niini.

Moabot sa 120 ka banyera ang nasakmit gikan sa RAV-1 nga giluwanan og 29 ka crew, apil na niini ang usa ka ka armadong gwardiya sa Sikatuna Security Agency.