GIPAHUGTAN karon ang kampanya sa lokal nga kagamhanan sa siyudad sa Davao sa giingong rice smuggling.
Si Mayor Rodrigo Duterte mismo nagbahad niadtong mga negusyante nga nagpalusot og mga bugas dinhi sa siyudad.
Sumala sa mayor nga si Bureau of Internal Revenue Commissioner Kim Henares nanawag kaniya bahin sa giingong rice smuggling sa pantalan, Sasa, siyudad sa Davao.
Gipasalig ni Duterte nga mahimo niyang ukayon ang smuggling og bugas sa siyudad tungod kay ang kagamhanan pinaagi ni Henares nangayo og tabang kaniya sa pagpakgang niini.
Pastilan no, wala ra gyud nato masayri nga usa diay ang pantalan sa siyudad sa Davao nga dunay naglihok nga mga rice smugglers. Gani usa ka matud pa David Tan ang nabulgar nga nalambigit niining smuggling sa bugas.
Kon tinuod man nga gigamit ang atong pantalan sa siyudad niining maong kalihukan, nagpasabot lang nga dunay mga opisyal usab ang nakapahimulos niini.
Kon gukdon sa kagamhanan si Tan o kaha bisan kinsang mga negusyante nga giingong nag-smuggler og bugas dinhi, angay sab nga sutaon sa mayor kining mga opisyal sa pantalan nga nakigkunsabo sa mga suspek.
Di man mahimo nga makalusot lang ang mga bugas sa pantalan kon way pagtugot sa mga opisyal nga maoy nagdumala niini, di ba?