NAWAD-AN na og usa ka bulawang medalya ang Philippine team sa himuong 2014 Asian Games sa Incheon, Korea.

Kini human gitangtang na ang isports nga bilyar sa himuong Asian sporting events.

Subay sa report, wala na giapil ang billiards sa Incheon Games tungod giuban na ang cue sports sa Asian Indoor Martial Arts Games.

Giila ang Pilipinas isip pinuy-anan sa mga kampeyon sa billiards nga gilangkuban nila Efren "Bata" Reyes, Ronnie Alcano ug Dennis Orcollo.

Kahinumduman nga niadtong 2010 Guangzhou Games, gold medalist si Orcollo sa men's 9-ball tournament.

Apil sa nakasungkit og bulawang medalya sa billiards sa Asian Games mao sila Antonio Gabica niadtong 2006 sa Doha, Qatar, Gandy Valle ug Romeo Villanueva niadtong 1998, ug Francisco Bustamante ug Antonio Lining niadtong 2002 sa Busan, Korea.

Ang 2014 Asian Games himuon sa September 19 ug matapos October 4.