KIDAPAWAN CITY -- Pangilkil na sab karon ang gisulod nga raket sa mga miyembro sa Bangsamoro Islamic Freedom Fighters (BIFF) didto sa probinsiya sa Maguindanao ug North Cotabato.

Mismo si Malitubog Maridagao Irrigation Project (Malmar) manager Engr. Nolly Uyod nagkompirma nga nangayo og P3 milyones nga protection money ang BIFF.

Nagbahad ang grupo ni Ustadz Ameril Umbra Kato nga ilang sunugon ang mga heavy equipment sa mga kontraktor sa Malmar Irrigation Project sa Pikit ug Aleosan, North Cotabato kon mapakyas paghatag sa maong kantidad.

Gisundan na sab sa BIFF ang pagpanghuraw sa mga nagtrabaho sa irrigation project.

Dunay mga kontraktor na sa Malmar Irrigation Project ang nagplano nga mo-atras gumikan gipangayuan sab sila og extortion money sa mga rebelde.

Gikanayon ni Uyod nga gawas sa BIFF dunay ubang grupo pa ang nangikil sa Malmar apil na niini ang Alkhobar Terror Group ug ubang armed lawless group.

Naghangyo si Uyod sa mga lokal nga opisyal, militar, kapulisan ug Moro Islamic Liberation Front nga tabangan sila alang sa seguridad sa mga kontraktor aron di mabalda ang P6.5 bilyon nga irrigation project.

Ang pundo sa maong proyekto naggikan sa Disbursement Acceleration Program Pangulong Benigno Aquino III. (Edgar Fuerzas)