MAHULOG gyud niining titulo ning maong kanta ang saad ni Mayor Mike Rama nga financial assistance ngadto sa mga senior citizens dinhi sa dakbayan sa Sugbo. Misaad ang mayor nga umentuhan ang financial assistance sa mga senior citizens gikan sa P10 mil niadtong miaging tuig ngadto sa P12 mil karong tuiga. Apan gumikan kay gilaslasan sa konseho ang gisubmiter niining budget halos katunga, himoon nalang kini sa mayor nga P6 mil.
Ang executive department misubmiter kini og P10 bilyones nga gahin alang sa 2014 ngadto sa konseho. Apan ang konsiho nga gidominar sa mga sakop sa Bando Osmeña Pundok Kauswagan (BOPK) mi-aprobar lamang sa P5 bilyones. Kay wala kunoy igong income ang dakbayan nga sarang ikagasto. Pero gusto god nila nga i-sabotahe ang administrasyon ni Rama mao nga ilang gilaslasan og katunga ang gahin nga gisubmiter niini.
WA HILABTI
Apan nganong dili man ihatag sa mayor ang P12 mil nga iyang gisaad nga unta wala man hilabti sa mga konsehal ang gahin nga P720 milyones alang sa senior citizens? Maayo unta nga gi-ibanan ang maong gahin nga maoy himoong rason sa mayor nga katunga lang usab ang iyang ihatag ngadto sa mokabat nga 60 mil ka mga senior citizens ning dakbayan. Ang uban ani god dili man pod taga dinhi. Gidala lang sa ilang mga anak nga ania manarbaho dinhi sa siyudad gumikan sa kadako ning maong benepisyo.
Nakabudget na kana nga usa kalibo matag buwan. Ang konseho miaprobar sa maong budget kay nagtan-aw man usab sila sa kahimtang sa mga senior citizens. Bisan god tuod og pamulitika usab kanang ila. Hinoon, mi-ingon man ang mayor nga iyang pa-estudyuhan ni kanhi Konsehal Joey Daluz kon unsa ang laing mahatag sa kagamhanan isip hulip sa P6 mil nga maiban. Hatagan siguro nila og Viagra o ba kaha tambal sa diabetes.
Para nako wala gyoy laing nakahulip niana kon dili ang maong kantidad ra gyod. Importante ang kuwarta sa mga senior citizens aron ikapalit nila og medisina.
DELIKADO
Kon dili tumanon ni Mayor Rama kining iyang gisaad sa mga senior citizens delikado ang iyang karera sa pulitika sa 2016. Tiaw ba nimo kanang adunay 60 mil ka mga senior citizens ang ania sa dakbayan. Ibutang lang nato nga adunay 30 mil o katunga niana ang mga botante, aw, dako na kanang boto alang Kaniya. Unya kon saaran na ni Tomas Osmeña nga kon siya maoy mamayor iya kanang iyang ihatag. Delikado nga ma-chocolated siya.
Tumana gyud tawon na, Mr. Mayor, aron dili ka ma-sekwate.
(bobby.nalzaro@yahoo.com)
Sent from my iPhone