BAG-ONG tuig gisugat ta og mga isyu nga dala sa mga kawsa alang sa tinud-anay nga panggobyerno sa nasud. Hangtud nga dili tinuod ang mga personalidad nga magdala sa politika sa nasud dili gihapon makab-ot ang damgo sa katawhan nga bisan ug kadiyot lang makabaton og kaharuhay.
Matud pa sa taho gikan sa Population Commission o PopCom nga karong tuiga moabot na sa usa ka gatus ka milyon ang gidaghanon sa Pinoy sa Pilipinas.
Wow, matag tuig nag-anam og kadaghan ang mga Pinoy mora'g walay mortalidad o namatay sa report sa Popcom. Walay kibhang, sige lang og dungag.
Anyway, dili kaayo ko suheto kon giunsa nila ni pagkumpyot kay ila ning trabaho. Ang tinguha ra nako niini ron mao nga nagkadaghan ang katawhan apan wala gayud motaas ang ang-ang sa kinabuhi sa Pilipinas. Midaghan ang molupyo apan wala modako ang tinapay nga bahin-bahinon niini.
Dinhi nato basihan kon giunsa pagdumala sa atong nasudnong kagamhanan ang suliran nga atong gisagubang karon.
Dinhi sa dakbayan sa Dabaw, bisan og giunsa pa og paningkamot sa liderato ni Mayor Rody Duterte, nagpadayon pa gihapon ang uban sa pagkamasinupakon sa balaod nga miresulta na hinuon sa ilang pagpahulay sa dayon (Rest in Peace). Wala magpasabot nga ang kagamhanang Duterte sa dakbayan mibangon sa gitawag og extra-judicial, apan mao na kini ang kamatuoran ug tingali walay mobabag nako nga tungod sa hait nga suwab sa espada ni Duterte pagpatuman sa balaod, mitaas ang moral sa atong mga awtoridad. Dili na kini mahadlok pa nga ipatuman ang balaod bisan luyo sa tanan, sumala sa tradisyon, nga may mga padrinong kagamhanan ang ilang maligsan.
Dako kaayo ang akong pagtamay karon sa Malacanang sa dihang si Kalihim Herminio "Sonny" Coloma sayon ra kaayong migamit sa ngalan sa Malacanang ug mipahimangno kang Mayor Rody nga dili kumkomon ang balaod pagsulbad ining suliran sa ilegal nga pagpalusot sa mga inangkat nga mga kontrabando.
Sa sayon nga pagsabot "smuggling" nga dako na kaayo'g nawala sa panudlanan sa atong gobyerno tungod sa modus operandi niining walay kahadlok nga mga smuggler nga misabotahe sa ekonomiya sa nasud.
Gipangayoan og tabang si Mayor Rody sa Malacanang aron masumpo kini nga modus dinhi sa habagatang Pilipinas, apan niay Coloma nga mi-react.
Nakatawa lang ko. Wala gyud huna-hunaa ni Coloma ang iyang mga gipanulti ug natataw na hinuon karon nga ang Malacanang dunay kamot niining mga kontrabandista sa atong nasud.
Dili kuno ibutang ni Duterte ang balaod sa iyang mga kay sulbaron ra kini sa balaod batok sa kontrabando. Mora'g nahadlok ang Malacanang nga tingali'g mabulgar sila nga naa ra diay naglumlom sa Palasyo ang padrino sa mga smugglers.
Sa ato pa, sa dihang naghulga si Mayor Rody nga iyang patyon kining mga smuggler, kurog na ang Malacanang nga tinud-on ni Duterte ang iyang bahad kay tingali'g mamatay na sila sa dayon.
Si Bigcas nga smuggler sa Cagayan de Oro, gipangga baya sa Malacanang?