Sinulog sud sa CPDRC

SUBAY sa kasaulugan sa Pista Senyor ug Sinulog sa Sugbo, ang nabantog nga dancing inmates sa Cebu Provincial Detention and Re­habilitation Center (CPDRC) dunay kaugalingong ha­lad nga sa­yaw alang sa Balaang Bata.

Matod ni CPDRC consultant, Marco Toral, mohalad ang mga priso og sayaw ngadto sa Santo Niño agi’g pasalamat nga luwas ang tanang pinirisu sa provincial jail bisan sa mga kalamidad nga niigo sa Sugbo sama sa linog ug bagyo.

Adto na sa Enero 25 ipahiga­yon ang pasundayag sa dancing inmates, nga mao usab ang ika-upat nga Domingo sa buwan, diin ilang naandan ang pagsayaw diha sud sa ilang pasilidad.

Gidapit ni Toral ang tanan sa pagsaksi sa Sinulog presentation sa mga inmates, ilabi na kadtong mga balikbayan ingun man ang mga langyaw ug loklal nga turista.

Sa laing bahin, gihakot na sa mga Suroy-suroy Sugbo buses ang mga contingent gikan sa mga lag­yong lugar sa lalawigan nga mao ang Dakbayan sa Bogo ug mga lungsod sa Tuburan ug Ginatilan.

Kini alang sa ilang pagsalmot sa Sinulog sa Kabataan sa Lalawigan karong Sabado.

Matod ni Provincial Tourism Officer, Grace Paulino, ang Bogo, Ginatilan ug Tuburan mao lamang ang ni-request sa Provincial Tou­rism Office aron makahulam sila sa mga Suroy-suroy Sugbo buses nga mahimong maka-transport sa ilang dancers ug props paingon sa siyudad sa Sugbo.

Kagahapon sa hapon, gipanghakot na sila alang usab sa ilang rehearsal sa Cebu City Sports Center.

Lakip sa mga lungsod nga nipahulam sa ilang bus alang sa mga Sinulog contingent mao ang Moalboal, Argao ug Daanbantayan.

Ang mga contingent nga anaa lang sud sa Metro Cebu, sama sa Talisay, Naga, Carcar ug Danao, nigamit ra sa ilang kaugalingon nga resources ug wa na ni-request pa ug bus gikan sa Provincial Tourism Office.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph