DUHA ka mga lalaking taga dakbayan sa Lapu-Lapu misuway sa pagpakamatay.

Pulos napalpak ang ilang tinguha tungod sa mga sirkumstansya.

Ang usa sa mga gustong magpakamatay miambak sa Mactan bridge, apan pagtugpa sa ubos, paspas nga milangoy padung sa daplin sa dagat.

Samtang ang usa giingong nahulog gikan sa gibitayan niya kay nabugto ang higot sa iyang liog.

Napakgang ang pagpakamatay unta ni Eli (di ti­nuod niyang ngan), 32, kay naabtan sa iyang inahan samtang siya nagbitay sulod sa iyang lawak niadtong Miyerkules sa udto.

Kini nahitabo sulod a gipuy-an sa banay sa Deca 4 sa Barangay Bankal, Lapu-Lapu City.

Saysay ni P02 John Carlo Jocutan sa Homicide Section sa City Police Office nga si Eli gihulagway nga nabuang sa tigbakay.

Gituohan sa kabanay nga nakahukom maghikog kay wa hatagi og kuwarta nga ipusta.

Nagpaninggit og tabang ang inahan ni Eli ug nitabang gilayon ang ilang kaparyentihan pinaagi sa pagkugos kaniya samtang nagbitay dayon putol sa nylon nga gihugot sa iyang liog.

Apan nakakuhag impormasyon ang Police Station 5, diin matod pa ni Sr. Insp. Junnel Caadlawon nga naputol ang pisi nga gigamit ni Eli hinungdan nga wa madayon ang pagpakamatay.

Wa makadaog ang pisi sa gibug-aton ni Eli ilabi na nga gamay ang higot nga gigamit niini.

Kasamtangan nga anaa sa Vicente Sotto Memorial Medical Center si Eli.

Sa laing bahin, nanglimbasog nga mabuhi si Allan, 37, human milayat sa Marcelo Fernan Bridge aron unta magpakamatay niadtong Miyerkules sa alas 11 sa buntag.

Apan kay wa mawad-i sa panimuot sa iyang pagtugpas, naningkamot siya sa paglangoy paingon sa baybayon.

Siya gidudahang wala pa katugpa gumikan kay high sa ginadiling drugas.