NILANDING sa balay tambalanan ang usa ka babaye human gilugos sa giingong silingan niini niadtong Miyerkules sa hapon diha sa Barangay San Juan, lungsod sa Balingasag, Misamis Oriental.
Giila ang biktima nga mao si Leonarda (ngalan ug bansagon gipugngan), 39, minyo, residente sa susamang dapit. Gitumbok nga suspetsado ang silingan nga mao si alyas Budok.
Ang bana sa biktima nga maoy niuban ni Leonarda sa Northern Mindanao Medical Center (NMMC) aron mopahigayon og medical check-up niingon nga nabilin ang iyang asawa sa ilang puloy-anan kay aduna siyay importanteng tuyo denhi sa siyudad sa Cagayan de Oro.
Gibilin niya iyang asawa nga maoy magbahog sa ilang mga manok sa ibabaw nga bahin apan diay sa pagbahog sa biktima anaa sa atbang nga bahin si Budok ug nag-inom sa ilimnong makahubog.
Gihanggat niini si Leonarda nga mag-inom ug nakig-inom usab ang biktima.
Dihang giingong lango na kini sa ilimnong makahubog nasaksihan mismo sa anak sa biktima nga gipas-an sa suspek si Leonarda paingon sa usa ka balay ug didto giingong gilugos ang biktima. Daw maoy namat-an niini nga wala nay sapot ug nakasibat na ang supetsado.
Tungod niini nagpa-record ang biktima sa Balingasag Police Station ug gitambagan sa kapolisan nga mopahigayon og medical check-up kinsa giingong nagpositibo sa pagpanglusos.
Desidido ang biktima nga pasakaan og kasong rape ang suspek.