TAAS nga kamot sa balaod mikaway. Padayong gipangita si Ret. Major Gen. Jovito Palparan Jr., kanhi nangulo sa 7th ug 8th Infantry Divisions sa Phil. Army. Ang Dept. of Justice mipahamtang og kasong 2 counts of kidnapping ug serious illegal dentention batok nila ni Palparan, Ret. Lt. Col. Felipe Anotado, Ret. Master Sgt. Rizal Hilario ug Staff Sgt. Edgardo Osorio. Sila ang mga akusado sa pagdagit sa duha ka mga tinun-an sa UP Diliman sa Hunyo 26, 2006 nga sila si Sherlyn Calapan, 27 ug Karen Empeño, 20 didto sa umahan sa Hagonoy, Bulacan. Lakip nga gidagit ang 57 anyos nga mag-uuma sa si Manuel Merino nga giingong misuway sa pagluwas sa duha ka mga tinun-an. Si Calapan sakop sa Anak-Bayan samtang si Empeño sa walhon nga League of Filipino Students (LFS).

Si Palparan sa iyang pangatungdanan nakadawat isip Distinguished Service Stars ug Gold Cross Medal ug kanhi representante sa Bantay Partylist. Paborito ni kanhi Pres. Gloria Arroyo kay walay kahadlok nga nakigbatok sa mga rebelde. Nadungog nga moihaw sa mga walhon nga naghulga sa nasod. Apan giitsahan og buling ang kaligdong.

* * *

Opisyal sa militar nga gimansahan og anomaliya. Si kanhi Gen. Avelino Razon Jr. mitahan niadtong Agusto 28 human malutsi og warrant of arrest sa Sandiganbayan.

Gitumbok si Razon ug 16 ka mga opisyal sa anomalosong pagpaayo sa 28 ka mga armored vehicles sa kantidad nga P400M sa 2007. Laing mga opisyal nga dunay lama sa anomaliya naglakip nila ni Lt. Col. Carlos Garcia, Gen. Angelo Reyes, Gen. Diomedio Villanueva ug Gen. Roy Cimato. Si Reyes nga nabulit sa kauwaw naghikog.

* * *

Naglomlom sa korte ang anomalosong pagpalit sa duha ka segunda-mano nga helicopters sa 2009. Gipatuo nga bag-o gikan sa Manila Aerospace Trading Corp. ubos sa kantidad P104,985,000 sa 2007-2010. Nalambigit sa maong transaksyon si kanhi First Gentlemen Mike Arroyo ug 21 ka mga opisyal sa PNP. Nalimpyohan ang ngalan ni Police Special Action Force Chief Leocadio Santiago Jr. sa iyang apelasyon. Sandiganbayan na ang maong kaso.

* * *

Korte Suprema mosipong sa ilang kaugalingong inbestigasyon batok ni Arlene Angeles Lerma (Maam Arlene) nga nagmansa sa ilang kaligdong. Nabaniog nga si Maam Arlene mipaulan og mga mahalong regalo ngadto sa mga maghuhukom sa Regional Trial Court, Court of Appeals ug Supreme Court bugti sa pabor nga desisyon. Upat ka grupo ang nag-inbestigar. Komitiba nga gipangulohan ni Associate Justice Marivic Leonen, Supreme Court Administrator Jose Midas Marquez, DOJ-NBI ni Chief Justice Ma. Lourdes Sereno ug Court of Appeals Presiding Justice Andres Reyes Jr.

(csa_1156@yahoo.com/0905-250-4643)