NAMUNGINGI na sab sa daghang dayandayan ang kadalanan sa dakbayan sa Sugbo. Human sa selebrasyon sa Pasko ug Bag-ong Tuig ang Piyesta Senyor na sab ang atong gikabisihan.
Gani daghan ang nagsugod na pagpangumpra og unsay sarang nga maandam alang niadtong magkumbira kay lage naandan na nila nga gimbuhaton isip panaad sa iyang kapistahan.
Mao ni tradisyon nga lisod putlon. Kinsa bay makapugong sa tawo nga mag tumba og baka kay maoy iyang gisaad kong maayo sa iyang sakit. Ang uban bisan sa ginagmay nga paagi magluto og lamian nga putahe tungod sa panaad. Ang uban gani nag gikan pa sa layong dapit moanhi lang sa Sugbo tungod sa ilang saaran sa Senyor. Ang taga Amerika ug ubang suok sa kalibutan mopliti og mahal tungod sa ilang panaad.
PANGLAWAS
Nakatambong ko sa unang Santos nga Misa sa pagsugod sa nobenaryo ni Santo Nino niadtong Huwebes. Human sa misa akong nainterbyu ang pipila nga nagdala og mga imahen sa Senyor. Pananglit si Crimson Flores nga taga Mandaue City. Matod niya ang ilang imahen gipatuyo gyud og pakulit sa Talisay City ug ang senina sa Manila pa gipatahi.
Ang iyang Mama Grace nitug-an pinaagi sa maong imahen nalipay siya kay gihatagan sila og piskay nga panglawas sa tibuok tuig. Siya nagtoo nga ang Santo Niño dako og papel ngano nga kita wa magrabehi sa linog ug bagyong Yolanda sa niaging tuig. Pipila lang ni sa mga sugilanon nga gipaambit sa kamelagroso sa Batang Jesus. Di man siguro tanang gipangayo nato ihatag sa Senyor, basin sa lain niya gihatag ang uban natong gipangayo.
Mao bitaw nga sa dihang gipangutana ko kong unsay akong gipitisyon sa Senyor, ang akong tubag pagkaon diha sa lamisa nga idlas sa mga kabus natong kaigsoonan. Kay kong duna lang gyuy daghang pagkaon nga masaw-an sa oras tingkaon makalaom kita nga malayo sa sakit ang nagmasakiton natong kaigsoonan.
DEBOSYON
Sa akong report sa TV Patrol niadtong Martes akong nahisgutan nga sa unang higayon magsaulog ta sa kapistahan ni Senyor Santo Niño nga way kampanaryo ug way tingog sa kampana ang mabati diha sa Basilica. Kini tungod kay giguba sa linog ang kampanaryo ug gihulog ang duha ka kampana. Apan bisan pa ini ang atong hugot nga debosyon sa Batang Jesus maisip nga mas lanog pa sa kampana nga natagak og maghatag kanato og kahigayonan pagpabarug ug bag-ong kampanaryo diha sa atong kasingkasing.